Ban kyntiew ia ka kam rep Syntiew ha Meghalaya, la pynlong iaka jingiathir jingmut bad ki kynhun ba ia don bynta

Syllad | The Rising MeghalayaNovember 2, 2023

Ka Sorkar Meghalaya ka la shim ia ka sienjam ka ba kongsan ban kyntiew ia ka kam rep syntiew ki skud ha ka thain da ka ba pynlong ia ka prokram ba ar sngi halor ka mat “Stakeholder Consultation Workshop” ban plie lad ha Meghalaya lem bad ka jingphai khmat sha ka kam thung syntiew.

La pynlong ia kane ha prokram ha Courtyard by Marriott, ha ka 1 tarik mynta u bnai da ka jingthmu ban pynmih ia ki jingiakren ki baiar bad ka jingiasam ia ki buit hapoh ka tnat.

Ha kane ka workshop la ia don lang ruh ka Kong Ampareen Lyngdoh, Myntri ka tnat ka rep ka riang ka sorkar jylla kum ka kongsan bad ka kong Isawanda Laloo IAS, Secretary ka tnad ka Rep ka Riang kum ka Symbud Kongsan nalor ka Kong S Kharsati Director ka tnat ka rep ka riang, kong D Sohtun Director ka tnad Horticulture, ki Hub manager na kylleng ka jylla bad ki stad saian, ki nongwad bniah bad ki kompeni bad ki seng bapher bapher. Kane ka workshop ka wanlam lang hajuh ia ki briew bapher bapher ban wan bad plielad ia ka jinglah ka karkhana rep syntiew  ha Meghalaya.

Na ka liang ka kong Ampareen Lyngdoh ha ka jingkren ka la ong, ” Ha ka jingpyrshang jong ngi ban kyntiew ia ka roi ka par bad ka jingioh lad, ka sorkar Meghalaya hapoh ka ka jingialam u Myntri Ranbah kala pyllait paidbah ia 14 tylli Horti Hub ban kyntiew ia ka jingthung syntiew bad ban pynmih ia bun ki kam ki jam shabar ka tnat.

“Ngi sakhi ia ki jingsdang da ki producer group ha Umsning bad ban ithuh ia ka jingriewapah ka mei ramew. Ki prokram kum ka Floriculture Development Scheme bad ka Prime Scheme bolster commercial floriculture bad ka iew ka hat, ban pynmyntoi ia ki longkmie. Ngi dang wad ia ka jingbei tyngka bad ban wad ia ka jingiasnoh hapdeng ka tnad jngohkai bad ka kam rep syntiew ban pynwandur ia ka lawei baphyrnai ka Meghalaya,” ong ka Myntri.

Ka Myntri ka pynpaw ruh ka jingsngewskhem ia ka jingai mynsiem ba kine ki workshop ki ai sha ki nongrep ban pymthikna ba ki jingmih jong ki, ki iaryngkat bad kiwei pat ki ka pyrthei bad kala banjur ba ka kam rep syntiew ka dei ka pyntha ka ba kynthup lang ia baroh bad shynrang bad kynthei ki lah ban kiew.

Kumjuh na ka liang ka kong Isawanda Laloo, IAS, Secretary ka la pynpaw halor ka jingkongsan ha kaba pynlong ia kiba kum kine ki workshop  da kaba ong, “Haba ngi peit ia ka jingkhein ha ka ri, ngi shem ba ka India ka noh synniang tang 0.6% na ka jingkhein ki iew syntiew ha ka pyrthei ka ba long ka ba rit eh bad ka India bad ka jylla Meghalaya ki don ia ka lad ban lah ban noh synniang ban kyntiew ia ka jingshalan syntiew ym tang hapoh ka  thain, ka ri hynrei wat sha ki iew shabar ri.

Ka la ong ruh ba ka tnat Horticulture ka don bad kan pyniaid haduh 14 tylli ki Hortihub ha kylleng ka Rilum Khasi bad Jaintia. Kine ki horti hub ki iarap ia ki nongrep syntiew bad ki nonglum ia ki syntiew, ban pyniaid iew bad ban song ia ki bad khatduh ban shalan ia ki sha kylleng ki iew ha ka pyrthei”.

La sdang ia ka workshop da ka jingpyni ia ka jinglong jingman ka jingrep syntiew ha Meghalaya da ka tnat ka rep ka riang bad la pynlong ruh ia ki jingiakren baiar bad sani bha halor ki jingthung syntiew, kata naduh ka rukom thung haduh ka jingpyniaid iew. Ki nongiashim bynta na kylleng ka ri ki la wan ban iahim bynta ha kane ka prokram, ki nongsengkam lajong, ki stad ki jhad, ki nongrep syntiew ki ka ia sam lang ia ki jingtip bad jingshem jong ki, bad ban ithuh ia ki lad ba dep ban hap pynbha.

Ha ka ka por ba pynlong ia ka jingiakren kaba kynthup ia ki manager jong ki hub, ki nongrep ba hakhmat bad ki nongrep syntiew ki la tyrwa ia ki jingshem, ki jingeh bad ka jinglap ia ki buit thymmai hapoh ka tnat. La pynlut ia ka workshop da ka ba ringdur ia ka rukom treikam kaba sani bha ban plie lad ia ka jinglah ka karkhana rep syntiew ka Meghalaya, ban kynthup lang ia ki jingai jingmut bad ki jingiakren.