Ban kyntiew ia ka kam ri ngap soi MOU ka MFEC bad NECTAR

Syllad | The Rising MeghalayaJuly 20, 2023

U Myntri Rangbah ka jylla u Conrad K. Sangma u la iashim bynta ha ka jingialang ba ar sngi hapdeng ki kynhun kiba don bynta ban kyntiew ha ka kam ri ri ngap hapoh ka thain shatei lammihngi (Northeast) ha ryngkat ka jingiadon lang ki heh sorkar, ki nonghikai bad ki riew shemphang ha ka kam ri ngap,  kata kum u  B.K. Sohliya, Executive Adviser, Meghalaya Farmers’ Empowerment Commission (MFEC), Dr. Ashish Lele, Director, CSIR-National Chemical Laboratory (NCL), Dr. Arun Kumar Sarma, Director General, North East Centre for Technology Application and Reach (NECTAR),  K.N. Kumar, Chairman, Meghalaya Farmers’ Empowerment Commission (MFEC), bad u Dr. Avinash Chauhan.

Kawei na ki bynta ba kongsan jong kane ka jingialang ba la pynlong ha State Convention, Shillong ka dei halor ka jingiasoi ia ka Memorandum of Understanding (MOU) hapdeng ka MFEC bad ka NECTAR, kaba thmu ban ai ka jingiatreilang bad ka jingkyrshan ban kyntiew ia ka kam ri ngap ha ka jylla.Kane ka jingiatreilang kan kyntiew ruh ia ki lad ki kabu hapdeng ki nongri ngap ha ka jylla Meghalaya.

Haba kren ha ka jingialang, u CM Conrad Sangma u la pynpaw halor ka jingkongsan jong ka kam ri ngap ha ka jylla da kaba pyrto ruh ia ki sienjam ba la shim da ka Meghalaya Farmers’ Empowerment Commission na ka bynta ban kyntiew ia ka kam ri ngap ha ka jylla. U la ong ruh kaba kaba kum kane ka jingialang kaba heh hapdeng ki kynhun kiba ia don bynta ka dei ka bym ju kham jia koit hapoh ka thain Northeast, ha kaba la wan ban pyniasoh lang da ki riew shemphang, kata naduh ki saiantis haduh ki nongri ngap bad ki nongtrei kam lajong kiba don bynta ban kyntiew ia kane ka kam.

Na ka liang u CM u pynkynmaw ruh halor ka khana jingjop jong ka “Lakadong Mission,” ba la shim da ka sorkar ha ka kylla kaba nyngkong kaba la shim ia ka bynta kaba kongsan ban kyntiew bad pyniaid iew ia ki musli musla ba la pynmih da ki trai shnong, kata kum u shynrai Lakadong ia uba la lah ban kyntiew haduh 15 shah lyngba ka jingpyndonkam ia ka teknoloji kaba thymmai kaba la plielad ruh ha ka liang ka ioh kam ioh jam hapdeng ki longkmie hapoh ka jingialam ki kynhun self-help group ban kyntiew ia ka ioh ka kot jong ki nongshong shnong.

Nalor kata u la ong ruh ba ia ki sienjam ba la shim da ka jylla yn sa lah ban pynbiang ia ki iew ki hat hapoh la ka jong ka jylla bad ruh ban pyndap pynbiang ia ka jingdawa jong kiwei pat ki ri ka pyrthei. Da kaba pynioh ia ki jinghikai kiba dei biang bad ia ki jingdonkam na ka bynta ki nongri ngap trai shnong, na ka liang ka sorkar ka kyrmen ym tang ban kyntiew ia ka ioh ka kot hapdeng ki nongshong shnong jong ki thain nongkyndong hynrei ruh ban pynwandur pat ia kane ka kam ri ngap lyngba ka juk jingstad saian.

U Myntri Rangbah ula ong ruh ba lyngba kane ka jingiasoi ia ka MoU yn lah ban thaw ia ki kynhun iatreilang kum ka NECTAR, ka ban pynmyntoi shibun ia ki nongri ngap ka jylla.Na ka liang ka sorkar ka la ithuh ruh ia ka kam ri ngap kum ka bynta ka bym pat shym la pynleit jingmut bha bad kaba dang dei ban kyntiew ha ka jingbei tyngka khnang ba katkum ka thong haduh 1 lak ngut ki nongrep ka jylla Meghalaya kin lah ban kynthup lang ia kane ka kam ri ngap.