Ban kyntiew ia ka rep Strawberry, pynlong ka tnad Horticulture & Tourism da ka tamasa Strawberry Festival ha ki 3 District

Syllad | The Rising MeghalayaApril 13, 2024

Ban pynkhie im biang ia ka tamasa na ka bynta ban kyntiew ia ka kam rep soh strawberry hapoh ka jylla Meghalaya, haka 12 tarik Iaiong, ka tnad Horticulture ha ryngkat bad ka tnad Tourism ka la sdang biang ban pynlong ia ka Strawberry Festival 2024 kaba ar sngi lynter ha ki lai tylli ki District kiba kynthup ia ka Ri Bhoi District, East Khasi Hills bad West Garo Hills.

Ha ka tamasa kaba la sdang ha Ri Bhoi District la pynlong ia kane ka tamasa ha ka shnong Sohliya kaba la tip ruh kum ka Strawberry Village ha kaba u Vijay Kumar D. (IAS), Commissioner Secretary ka tnad Tourism u la wan ban plie ia kane ka tamasa kum u kongsan ha ka jingiadonlang ruh u Bah O. Lyngkhoi, Rangbah Shnong ka Sohliya lem bad kiwei kiwei ki heh ophisar.

Ia kane ka tamasa strawberry la pynlong ha ka shnong Sohliya, Ri Bhoi District, ha ka shnong Syntung ha East Khasi Hills bad ha ka shnong Darechikgre jong ka West Garo Hills.

La iatreilang ruh ban kyntiew ia kane ka tamasa, ha ryngkat ka kynhun jong ka Opus Production bad ka Meghalaya Grassroots Music Project, ha kaba ki don shibun ki jingpynbyrngia naduh ka jingiaid kjat, ka jingniah cycle, ki jingialehkai jong ki khyllung khynnah, ka jingiohlad ruh ban leit kheit ia ki soh strawberry na ki farm ha kane ka shnong bad ruh ka jingdon jong ki dukan die jingdie kiba die ia ki soh strawberry, ki wine, ki umsoh bad ka bam bapher bapher.

Haba kren kum u kongsan hadien ka jingwan ban jurip bad ban mad ia ka jingthiang bad jingbang jong u soh strawberry na kawei ka strawberry farm, u Vijay Kumar D u la pynpaw ka jingkmen kaba khraw ban ia don bynta ha kane ka tamasa ban kyntiew ia u soh strawberry bad ban kyntiew ia ka ioh ka kot jong ki nongrep ia u ne u soh hapoh ka jylla Meghalaya bad ha kane ka shnong Sohliya kaba dei ruh ka jingthmu jong ka sorkar jylla ban iai bteng ia kum kane ka tamasa na kawei ka snem sha kawei pat ban kyntiew ia ki nongrep hapoh ka jylla.

U la ong ruh, ba ka jingiatreilang hapdeng ka tnad Horticulture bad ka tnad Tourism kan kyntiew bha ia ki nongrep kiba rep ia shibun ki mar rep kiba lah ban ioh ia ka jingiohnong na ka jingwan ia shimbynta jong ki nongwan jngohkai pyrthei na kylleng ki ri bad ki jylla bapher bapher bad ka jingiatreilang jong kine ki ar tylli ki tnad treikam sorkar kan pynmyntoi shikatdei ia ki paid nongrep jong kane ka jylla.

“Ka jylla Meghalaya ka dei ka jylla kaba la ioh ia ka jingkyrkhu kaba kyrpang namar ka jinglong jingman jong ka suinbneng kaba itynnad, ka jingsbong ka khyndew ban rep ban riang bad ka jingdon jong ki kshaid kiba itynnad ka wanrah shibun ki kabu ia ki nongrep bad kito kiba trei ha ki bynta jong ka tnad Tourism ban kyntiew ia ka ioh ka kot bad ka aikam aijam, kumta na ka liang ka tnad tourism ruh kan iai bteng ban pynlong ia kum kine ki tamasa khnang ba ki nongwan jngohkai pyrthei kin ioh ban mad ia ka jingitynnad bad ka jingbang jong ka bam ka dih, ki soh bapher bapher kiba mih na kane ka jylla”, ong u Vijay Kumar.