Ban lait na ki kam shah thok pisa, iakynduh ka KSU-EJH ia u BM ka SBI

Syllad | The Rising MeghalayaNovember 21, 2023

Ka Khasi Students’ Union (KSU), East Jaintia Hills District Unit ka pynpaw ka jingsngewkhia kaba jur hadien ba la ioh pdiang ia ka jingujor kiba bun na ki paidbah halor ka jingshah thok pisa ha ki kompeni bapher bapher, online gaming, online trading kiba shu thok kiba  kular ia ka jingioh kaba bun lyngba ka jingbei tyngka kaba rit.

Halor kane ka Seng hapoh ka jingialam jong u Pynshai Kupar Dkhar Assistant General Secretary, Shaniahskhem Dkhar Finance Secretary bad Shwari Ryngkhlem ki la leit ban iakynduh ia u Branch Manager ka State Bank of India (SBI) Ladrymbai ban kyrpad bad ruh ban ai ka jingiatreilang bad ka seng da kaba  pynlong da ka awareness program halor kiba kum kine ki kam shukor pisa na ka bynta ki paidbah jong ka thaiñ East Jaintia Hills, kata ki ban kynthup naduh ki khynnah skul, ki samla college kumjuh ki rangbah bad ki longkmie.

Kumjuh ruh ka Seng ka la iakren bad u Branch Manager na ka bynta ban shim ia ki sienjam khnang ban lait na ki jingshah pynbeij ha ki kompeni, online Earning apps lane ki briew ba kular ban pynioh nong shiphew shah na ka jingpynlut kaba tang khyndiat. 

Na ka liang u BM ka State bank of India Ladrymbai branch u pdiang sngewbha ia kane ka jingtyrwa jong ka seng bad kular ban iasnohkti lang bad ka seng ban ai jinghikai ia ki paidbah ban lait na ki briew ba thok ba shukor bad kiba kwah ban bam ei ia ka pisa jong ki paidbah khlem lyngba ki buit thok buit shukor jong ki.

Ha kajuh ka por ka KSU ka kyntu ruh kumjuh ia ki paidbah ba ki dei ban long kiba  husiar bha ia kino kino ki jait kompeni lane ki briew ba wan ban khroh bad pynbiej da bun jait bun rukom da ka jingthmu ban shim kabu ban lute pisa na ki.