Ban pynduna iaka jingiap ki kmie bad khunlung la sdang iaka Transit Home ha Barato

Syllad | The Rising MeghalayaSeptember 1, 2022

U Block Development Officer, Laskein C&RD Block u Ma B Niang haka sngi Balang u la plie paidbah ia ka Transit Home ha ka shnong Barato. Kane ka transit home ka dei ka jaka iarap iaki longkmie ba armet ban pynpoi sha ki jaka sumar haka por kaba biang ban iada na ka jingiap ka kmie bad ki khunlung.

Kane ka transit home dei kaba la tip kum ka Pdeinyurim Transit Home kaba pyniaid da ka Laichaphrang Village Organisation, kaba hap hapoh ka Barato PHC. Kane ka jaka iarap shipor iaki longkmie kaba hap hapoh ka skim Chief Minister Safe Motherhood Scheme, kaba la sdang ka sorkar Jylla naduh u bnai Lber mynta u snem.

Shuwa ban plie paidbah ia kane ka transit home la don ka jingialang kaba lyngkot kaba pyniaid da ka Jaintia Hills Development Society (JHDS), ka kynhun treimon sngewbha kaba pyniaid iaka Barato bad Sahsniang PHC. Ka dei ruh kaba nyngkong ban pyntreikam ia kane ka skim.

U Block Programme Manager, Laskein Block u Ma L Sympli ula iathuh shaphang ka skim ha ryngkat ka jingiadonlang ki nongialam shnong ka Barato, ki nongialam bad dkhot jong ka Village Organisation (SHGs).

U BDO haba kren ula kitbok kitrwiang ia ki nongialam bad dkhot ka Laichaphrang VO ba kin lah ban pyntyllun hok iaki kam katkum la bynshet ban pynshlur iaki longkmie ban kha iaki khun haki hospital khnang ban iarap ban pynduna iaka jingiap ki kmie bad ki khunlung ha katei ka thain.