Ban pynkut ia ka bamsap ka MPSC: Kyrpad ka KSU ia ki 13000 ki samla iakhun MCS ban dawa pyllait ia ki marks

Syllad | The Rising MeghalayaAugust 4, 2024

Ka Khasi Student’s Union (KSU) hynne ka sngi 3 tarik ka la kyrpad ia baroh ki 13000 ngut ki samla kiba iakhun ia ka eksam MCS (Prelims) ba kin iasnohkti lang ban pynkut noh ia ka bamsap hapoh ka Meghalaya Public Service Commission (MPSC) da kaba dawa ban pyllait paidbah ia ki marks ki jong ki.

Kane ka la wan long ruh shi sngi hadien ba ka MPSC ka la rai ban ym pyllait paidbah ia ki marks jong ka eksam MCS Prelims hadien ka jingpyrshah kaba jur na ki katto katne ki samla kiba iakhun ia kane ka eksam.

U Secretary jong ka Commission lyngba ka jingpynbna paidbah u la pyntip da kaba ong, “Ka jingtyrwa ban pyllait paidbah ia ki marks jong ki samla ba iakhun ia ka MCS Prelims ka dei kaba la pynpaw pyrshah jur da ki samla kiba iakhun ia ka eksam namar ka lah ban ktah ia ka hok ba shimet jong ki bad kaba dei ruh ka hok tynrai jong ki ba la pynskhem da ka Article 21 jong ka Riti Synshar khadar jong ka Ri India.”

Ia kane ka jingpynbna paidbah la pyllait hadien ba ka KSU ka la pynlong da ka jingiakhih shong kyllain mungor ban pynpaw pyrshah ia ka jingleh bym hok ha ka rukom thungkam bad dawa ban pyllait ia ki marks jong baroh ki samla kiba iakhun ia ka eksam MCS.

“Ngi kyrpad ia baroh kumba 13000 ngut ki samla kiba iakhun ia ka MCS Prelim ban wan shakhmat bad pynkut noh ia kane ka kam bamsap hapoh ka MPSC da kaba thoh sha u Chairman ka Commission ban pynpaw ba phim don kano kano ka jingpyrshah ban pyllait paidbah ia ki marks. Lada phim ia wan lang ngin ym lah ban iakhun ia ka kam bamsap ha ka rukom treikam treikam ka MPSC,” ong u Chairman ka KSU Employment Monitoring Cell u Samla Reuben Najiar haba kren sha ki lad pathai khubor.

Da ka shithi phah ki nongiakhun MCS sha ka KSU, kynnoh ba ka khun u Secretary MPSC kaba pyrshah pyllait paidbah ia ki marks

Nalor kata u la ong ba ka MPSC ha ka jingialang bad ki nongmihkhmat na ka KSU ka la mynjur ban pyllait paidbah ia ki marks jong ki samla kiba iakhun ia kane ka eksam.Hynrei, ka jingbym lah jong ka MPSC ban bat ia la kular da kaba rai ban ym pyllait aidbah ia ki marks jong ki samla kynthup ia 62 ngut kiba mih kyrteng ha ka thup bynrap ka pynlong ia ngi ba ngin ngeit ba ka don kaei kaei kaba sha lyndet, ong u nongialam ka seng da kaba pynkynmaw ruh ba ka seng kam shym la dawa ban pyndam noh ia ka eksam hynrei tang ban ioh ia ka jingshai da kaba pyllait paidbah ia ki marks jong ki samla ba iakhun ia ka eksam.

Kumjuh haba pynpaw ia ka daw ba la ai da ka MPSC ba ka jingpyllait ia ki marks ka pynkhein ia ka Article 21 jong ka Riti Synshar khadar jong ka Ri, une u nongialam ka Seng u la ong, “Mynta ka jingkylli kaba kongsan eh ka long ka jingpynkhein aiu kaba ka MPSC ka kren hangne.Ka Commission ka la pynmih ia ki kyrteng ha ryngkat ki roll number bad ki marks jong ki samla kiba iakhun ia ka MPS Physical Test, bad kane kajuh ka Commission mynta ka ong ba ka jingpyllait ia ki marks ka pynkhein ia ki hok ba shimet jng ki samla ba iakhun ia ka eksam.Ngi tip balei ba ka MPSC kan sheptieng ban pyllait ia ki marks jong ki samla ba iakhun ia ka MCS prelim exam wat hapdeng ka jingdawa ka jong ngi ban pyllait tang ia ki roll nombor ym ia ki kyrteng.

Kyntait ka MPSC ban pyllait paidbah ia ki marks eksam MCS ba pyrshah jur ki kyrtong ba iakhun

“Kumta ka jingong ba kan pynkhein ia ka hok shimet ka long ka bym don nongrim bad ka bym lah ban pdiang. Ka kam ba la leh da ka MPSC ka pynshisha ba ka don kaei re kaei ha lyndet” ula bynrap.

Nalor kata une u nongialam ka seng u la pyntip ruh ba u Chairman ka MPSC u la kyntait ban shim ia ka phone bad ban jubab ia ki text message jong ka seng halor ka jingpynslem jong ka MPSC ban pyllait ia ki marks da kaba pynlip ne switch off syndon ia ka phone.

Shuh shuh ula ong ba ka MPSC kala leh ia kaba bakla shibun naduh kaba sdang da kaba pynlong ia ka jingkhmih biang ia ka answer sheet ia kaba ka Commission kam lah satia ban leh ia kane.