Ban pynneh pynsah iaka mariang, hiar jurip ka Assembly Committee sha ki karkhana dewbilat bad jaka sain rnga dewiong

Syllad | The Rising MeghalayaSeptember 14, 2024

Ka Committee on Environment ka Iingdorbar Thaw ain ka Meghalaya hapoh ka jingialam u Chairperson u Bah Wailadmiki Shylla ha ka 13 tarik Nailur ka la pynlong ka jingleit jurip ia ki Cement Plant bad Coke Plant kiba don ha East Jaintia Hills District ban bishar bniah ia ki jingktah jong ki kam karkhana ia ka mei mariang.

Ki Dkhot ka Committee kiba kynthup ia ki laingut ki MLA, u Bah Mayralborn Syiem, Bah Sosthenes Sohtun bad ka Kong Santa Mary Shylla ha ryngkat ki dkhot kiba shah kynthup lang, kata u CP Marak IFS (Retd.), u Dr. W Ryngkhlem, ki ophisar ka district, bad ki ophisar ka Meghalaya Assembly, ki la don lang ha kane ka kynhun jurip.

La sdang ia kane ka sngi da ka jingialang ha Khliehriat Circuit House, bud sa ki jingleit jurip ia ka Jaintia Coke Pvt. Ltd ha Shiehruphi, ka Dalmia Cement Bharat Limited ha Thangskai, bad ka Star Cement ha Lumshnong kiba don ha EJH.

Ha kane ka jingleit jurip ia ka Star Cement ha Lumshnong, u Bah Wailadmiki Shylla u la ban jur ia ka bynta jong ka committee ban pynthikna ba ki kam karkhana kim dei ban wan ha ka jingduhnong jong ka jingpynjot ia ka mariang. “Kum ki nongshong shnong bad ki dkhot jong ka committee kaba khmih halor ka mariang ngi don ka kam kaba kongsan ban pynthikna ba ka jingpynneh pynsah ïa ka mariang bad ki kam khaii pateng kin iaid ryngkat ryngkat,” u la ong.

“Ngi don ka jingkitkhlieh ban pynioh ia ka mei mariang kaba kham bha bad ka lawei kaba phyrnai na ka bynta ki pateng ban wan,” u la ong, da kaba pynpaw ia ka jingdonkam jong ka roi ka par kaba neh ha ka thain.

U chairperson ula pan ruh na ki tnad ba dei khmih ba kan pynpoi sha committee ia ka thup ba bniah jong baroh ki coke plant ha Jaintia Hills, kata kiba treikam katkum ka ain bad kiba beain lada don. U la pan ruh ia ki jingtip ba bniah shaphang ki tyllong jong ki mar ba la pyndonkam da kine ki karkhana. U la pan ruh ia ka thup jong ki jaka tih maw ha baroh ar tylli ki thain jong ka East bad West Jaintia Hills, kynthup ia ki jaka tih mawshun bad maw salin.

Ula pan ruh ia ka kaiphod kaba iadei bad ka jingkhuid jong ka lyer na ka bynta u bnai Nohprah, namar ba ki jingtip ba la ai sha ka committee haduh mynta ki kynthup tang ia ki khyndiat bnai ba la dep kiba dei ha aiom lyiur,” u la bynrap.

U Bah Wailadmiki u la kren ruh halor ka jingdonkam jong ka jingshngain jong ki nongtrei bad ka jingpynrung kam ia ki trai shnong ka thain hapoh kine ki karkhana.

“Nga kyntu ia ki bor pyniaid jong ki karkhana pynmih dewbilat ba kin buh hakhmat eh ia ka koit ka khiah jong ki nongtrei. Ban pynthikna halor ka jingpynbiang ia ki tiar kiba biang bad ban peit bniah ia ka koit ka khiah man ka por. Kum u nongshong shnong, nga kyrpad ruh ba kin thung kham bun ki nongtrei kiba dei ki trai shnong ha kine ki karkhana. 

U Bah Mayralborn Syiem u la pynpaw ïa ka jingkitkhlieh jong ka komiti ban peit ïa ki kam ba ïadei bad ka mariang kiba ïadei bad ki karkhana bad ki unit ba don ha ka thaiñ, ban pynthikna ba kin ym pynmynsaw ïa ki paidbah. U la kubur ia ka bynta jong ki riew shimet ha ka roi ka par jong ka jylla bad u la pdiang sngewbha ia ka jingpyrshang jong ki.

U la pynpaw ia ka jingsngewkhia halor ka jinglong ka lyer, da kaba khot ia ka jingbuddien kaba lai man ka por bad pan ia ki kaiphod ba thymmai na ka Meghalaya State Pollution Control Board. U la ban jur ruh ia ka jingdonkam ban don ki rukom synreit um kiba man ka por bad ka jingpyrshang ban thung dieng man ka por, ym tang ha ka sngi pynneh pynsah ia ka mariang ha ka pyrthei, ban pynthikna ba ki dieng kiba la thung kin iai bteng ban roi .

Katba na ka liang u Bah Sosthenes Sohtun u la pynpaw ia ka jingsngewnguh ia ki kompeni kiba la noh synniang sha ka ioh kam ioh jam ha ka jylla hynrei u la ban jur ia ka jingdonkam ban don ka jingkitkhlieh kaba kham kyrpang ha kaba iadei bad ka mariang. U la ban jur ruh ia ka jingdonkam ban pyndonkam ia ki jingthmu jong ka CSR ban kyntiew ia ka jingpynneh pynsah ia ka mariang.

U la pynpaw ruh jingsngewkhia halor ki rukom treikam hapoh ki par, khamtam eh ia ka jingtih mawshun ha kaba u la kyntu ia ki tnad ba dei khmih ban thaw ia ki kyndon ban iada na ka jingktah ia ka mariang. 

Kumjuh na ka liang ka Kong Santa Mary Shylla ka la pynpaw biang ia kine ki jingeh da kaba kyntu ia ki kompeni ba kin shim khia bha ha kaba iadei bad ka mariang.

“Kane ka dei ka jingpynkynmaw ia ngi, khamtam ha kaba iadei bad ka mariang. Nga kwah ban kyrpad ia baroh ki kompeni bad ki kynhun barit kiba don bynta ha ka kam tih mawshun ba kin thung dieng ha ki jaka ba ki la tih. Ngi dei ban siew bai lutksan ia ka mariang bad ka imlang sahlang. Lada ngi pom ia ki dieng , ngi dei ruh ban thung thymmai ban pynphai biang ia ka jinglong ryntih,” ka la ong.