Ban pynshlur ban tyngkai iaka um: Sdang ka tnat PHE ia ka jingialap hapoh jong ka JJM

Syllad | The Rising MeghalayaAugust 22, 2023

Ka tnat Public Health Engineering (PHE), Department, Meghalaya haka sngi Nyngkong, bnai kala sdang ia ka jingialap halor ka jingdonkam ban tyngkai ia ki tyllong um ia kaba la tip kum ka ‘Water Guardians: Strengthening Sustainable Communities’ hapoh jong ka Jal Jeevan Mission (JJM).

Kane ka jingialap ka thmu ban lap bad ithuh ia ki shnong ha Meghalaya kiba la pyntreikam ia kine ki sienjam lane kiba long ka nuksa ha ka jingpyrshang ban tyngkai ia ka um hapoh ki shnong ki thaw ki jong ki. Kane ka jingialap ka dei ruh ka sienjam ban khmih halor ka jingkut jingmut jong ka jylla Meghalaya na ka bynta ka jingpynbiang um kaba neh.

Na ka liang u Marcuise N. Marak, Myntri ka tnat PHE ka sorkar jylla u la pyllait ia kane ka jingialap paidbah kum u Kongsan ha ka jingialang ha ka jingiadon ryngkat lang u Symbud Kongsan u  Syed Md. A. Razi, Commissioner & Secretary, PHED cum Mission Director, JJM Meghalaya, Kong  BM Lyndem, Chief Engineer, PHE bad kiwei pat ki heh sorkar.

Ha ka jingkren u Kongsan u la pynpaw halor ka jingdonkam ban shim ia ki sienjam na ka bynta ban pynneh pynsah ia ki jaka um bad ban pynthikna ruh ba ki tyllong um ki jong ngi kin dei kiba lah ban neh slem. U la ong ruh ba kane ka jingialap ka la wan long ha ka por kaba dei ei lyngba kiba bun ki daw bad kaba donkam ban tyngkai bad pynneh pynsah ia ki tyllong um. Ha ka juh ka por u Myntri u kyntu ruh ia ki nongshong shnong ba kin ai ka jingiatreilang na ka bynta ban pynlong ia ka lawei jong ka jylla  kaba shngain ha ka liang ka um.

U la ong ruh ba kane ka jingialap ka dei ruh ka bynta kaba ngi la sakhi halor ka jingtyngkai ban pynneh pynsah ia ki tyllong um da ki kynhun nongshong shnong ha ki thain nongkyndong ka jylla.

Ka  Jal Jeevan Mission ka khot ka wer ruh ia ki riew shimet bad ki kynhun nongshong shnong ban long ka mynta jong kane ka jingialeh ne movement kaba thmu ban khmih na ka bynta ka lawei kaba neh.