Ban rat dyngkhong ia ka jingpang TB ai jinghikai iaki nongsumar tynrai ha West Jaintia Hills

Syllad | The Rising MeghalayaAugust 29, 2023

Da ka jingthmu ban rat dyngkhong ia ka jingpang TB, na ka liang ka ophis ka District TB Officer, West Jaintia Hills ka la pynlong ia ka prokram aijinghikai ba shi sngi na ka bynta ki nongsumar tynrai ne traditional healers ha ka 25 tarik mynta u bnai hapoh ka ophis jong ka Thadlaskein C&RD Block West Jaintia Hills District.

U Bah Pynkhreh Susngi DPC (District Programme Coordinator) ka Jaintia Hills u pyntip ba ka jingthmu ha kaba pynlong ia kane ka prokram ka long ban pynshai sha ki nongsumar tynrai ha kaba iadei bad ka jingpang Tuberculosis khnang ba kin lap bad ithuh ia ki dak ki shin kiba iadei bad kane ka jingpang TB.

Na ka liang ka Dr. EBV Laloo DTO ( District Tuberculosis Officer) WJH ha ka jingkren ka la batai bniah sha ki nongsumar tynrai ha kaba iadei bad ka jingpang tuberculosis. Nalor kata ka la iamir jingmut ruh ha kaba iadei bad ki dak ki shin jong kane ka jingshitom bad halor ka jingdonkam ban leh ia ki tes bad ka jingsumar kaba pura na ka bynta kane ka jingshitom Drug Sensitive Tuberculosis (DSTB) bad Multi Drug Resistance Tuberculosis (MDRTB).

Nalor kata ka la pynpaw ruh halor ki jingkyrshan lyngba ki skhim sorkar na ka bynta ki nongpang kiba don hapdeng ka jingshah sumar.Nalor kata ka la pynshai ruh ha kaba iadei bad ka skhim Pradhan Mantri TB Mukt Bharat Abhiyan (PMTBMBA), kata ka skhim kaba thmu ban aijingkyrshan ia ki nongpang TB lyngba ka bam ka dih, ki lad jingsumar bad kiwei pat ki lad jingiarap.

Ha kajuh ka por ka la pynshai ruh hapdeng ki nongiashim bynta halor ki sienjam kiba iadei bad ka jingshim ia ki nuksa ne sample na ki briew kiba pyni ia ki dak ki shin jong kane ka jingpang TB. Ka la batai ruh halor kumno ban phah ia kine ki nuksa na ka bynta ban leh ia ki test ha ki  Primary Health centre (PHC) lane ki Community Health Center (CHC) kiba jan tam bad ban phah sha ki shapoh ki hospital.

Shuh shuh ka la ban ruh halor ka jingdonkam ban dih tista ia ki dawai dashin tad haduh ban da pyndep ia ka jingsumar.

Ha kane ka prokram ka la don ruh ka jingiamir jingmut kaba la aijingmyntoi shibun na ka bynta ki nongai jingsumar tynrai. Ki nongiashim bynta ki la mynjur ruh ban ai ka jingiatreilang bad ka tnat ka koit ka khiah na ka bynta ban ioh ia ka jingjop ha ka jingialeh pyrshah ban rat dyngkhong ia ka jingpang TB ha ka jylla.

La pynphuh pynphieng ia kane ka prokram lyngba ka jingrwai kaba kdew halor kane ka jingpang ba la iashim bynta da ki khynnah pule ka Women’s College, Shillong BSW department 3rd semester.