Ban shngain ka leit ka wan kyntu ki bor shnong iaka DMR ban khang iaka jingkit palat ki trok haka surok bah NH 6

Syllad | The Rising MeghalayaAugust 5, 2023

Ban wanrah iaka jingshngain ka leit ka wan ha surok, ki lai tylli ki shnong kiba kynthup iaka Umkiang, Donaskur bad Kuliang kila ai da ka shithi ujor sha u Inspector ka DMR Umkiang Check Gate ban kyntu ia u ban khang pyrshah iaka jingkit mawshun palat pud ki trok dumper ha surok bah NH 6, East Jaintia Hills.

Ki nongialam shnong jong kine ki lai shnong kila ong ba ka jingkit palat pud kine ki trok kit mawshun ka buh jingma iaki khynnah skul, nongshong shnong ba iaid ba ieng ha surok.

Kane ka jingkit palat ki trok ka lah ban wanrah iaka jinghap ki maw sha surok kaba lah ban wanrah iaka jingmynsaw mynsnam bad ki jingjia ba sngewsih.

Shuwa ban jia kino kino ki jingjia ba sngewsih, kine ki shnong kila kyntu ia u Inspector ka DMR ban nym shah iaki kali ba kit palat pud ia u mawshun kaba long ruh pyrshah iaka aiñ bad ban shngain ka leit ka wan u paidbah ha surok.

Ia kane ka jingujor la phah sha u Range Forest Officer, Apha bad Officer Incharge jong ka Umkiang Police Patrolling Post.