Ban shngain ka lynti synkieng Dawki Amlarem Jowai, kyntu u SP-West Jaintia Hills iaki nongniah trok ban long adkar

Syllad | The Rising MeghalayaOctober 28, 2023

Ka ophis u Superintendent of Police West Jaiantia Hills District ka la pynlong ia ka prokram pynshai paidbah halor ka jingshngain ha ki lynti surok (Road Safety) na ka bynta ki nongniah trok hapoh ka shnong Nongtalang.

Ha kane ka prokram kaba la pynlong haka 26 tarik Risaw, la wan iashimbynta da ki seng jong ki trai bad ki nongniah trok, Limestone & Coal War Jaintia Association, Synjuk ki Waheh Chnong War Jaintia bad kiwei kiwei.

Na ka liang ka tnat pulit la mihkhmat da u Bah C Syrti, MPS. SP West Jaintia Hills District, Bah GAL Marshillong, MPS, SDPO Amlarem bad u Insp. A. Phawa O/C Dawki PS.

Kiba la ai jingkren ha kane ka jingialang halor kiba bun ki mat kiba iadei bad kane ka phang ki kynthup ia u Chairman, u Bah Henry manner, Adviser na ka bynta ki truck and driver association u Bah Lop Pohtam, Waheh Chnong Nongtalang pyllun u Bah Min Lyngdoh, President synjuk rangbah shnong War Jaintia u BahTwin Rymbui, Secretary synjuk rangbah shnong War Jaintia u Bah Kampher Pohlong, u President traffic volunteers u Bah Medi Mukhim bad kiwei.

Ha ka jingkren na ka liang u SP ka district u la iai ban halor ka jingdonkam ban don akor ka burom bad ia ka jinglong ba phikir. U la kyrpad ruh ia baroh kiba la wan iashim bynta ha ka jingialang khamtam ia ki nongniah kali ban long kiba don akor ka burom khnang ban lah ban kiar na ka jingdheng kali ha lynter ka surok bah Dawki Amlarem Jowai namar kane ka dei ka lynti surok ba kongsan na ka bynta ki kam khaii bad ki kam jngohkai pyrthei.

Nalor kata u la iai ban ruh halor ka jingdonkam ruh ban phikir ha kaba iadei bad ki jingdih pynbuaid ha ka por ba niah kali namar ka wanrah ka jingma kaba khraw. Ha kajuh ka por u la batai bniah ruh ha kaba iadei bad ka jingshah ktah lyngba ka jingkyrni ha ki jingdih pynbuaid khamtam u drok..