Ban tehlakam ia ki jingjia aksiden kali, shen yn pyntreikam ka Sorkar ia ka speed limit

Syllad | The Rising MeghalayaMarch 25, 2025

U Symbud Myntri Rangbah ka Jylla uba khmih ia ka Tnad Transport, u Bah Sniawbhalang Dhar hynne ka sngi 24 tarik Lber u pyntip ba ka Sorkar Jylla shen kan pynmih ia ka jingpynbna ban pyntreikam noh ia ‘speed limit’ ha ki surok bapher bapher khnang ban iada ia ki mynsiem briew, bad pynduna na ki jingjia aksiden kali bad ban wanrah ka jingshngain na ka bynta baroh ki nongleit nongwan.

Haba kren sha ki lad pathai khubor, u Bah Sniawbhalang u la ong ba u la dep khot pynlong ia ka jingialang bad baroh ki Tnad kiba don bynta ha kaba iadei bad ka ‘road safety’ ne ka jingshngain ha ki surok.

U la ong, “Ngi la pynkhreh halor kane bad hapoh ka ar ne lai bnai ngin sa lah ban pynmih ia ka jingpynbna ha kaba iadei bad u pud na ka bynta ka jingniah sted ia ki kali ha ki surok bapher bapher ha ki jaka sor bad ki surok bah.”

“Ngi kyntu ruh ia ka tnad pulit ba kan pynthikna ban pyrkhing ha kaba iadei bad ka jingpynher sted palat ia ki kali,” u la bynrap.

Nalor kata u Symbud Myntri Rangbah u pyntip ruh ba la bthah ia baroh ki tnad treikam kiba don bynta ba kin shim ia baroh ki sienjam ban tehlakam ia ki jingjia aksiden ha ki jaka ba la ithuh kum ki jaka kiba ju jia bha ki jingjia aksiden.

“Ki don ki jaka ha kaba ki jingjia aksiden ki ju jia khah khah bad ngi la bthah halor ki lad ban pynbeit khnang ban pynthikna ia ka jingduna ki jingjia aksiden hadien habud,” u la ong.