Ban tem ia u COVID-19 phah pyrkhing ka KSU ha khappud

Syllad | The Rising MeghalayaMarch 26, 2020

Ka Khasi Students’ Union jong ka North Khasi Hills District Unit kala pynpaw ia ka jingaikhublei kyrpang ia ki bor pyniaid District jong ka Ri Bhoi kiba la shimkhia ban peitngor ban pyrkhing bad teh lakam ban lait na ka jingpang khlam Corona Virus (COVID-19).

Ha ka jingpyllait khubor lyngba u President, u samla Ferdynald Kharkamni, ka seng ka pynpaw ia ka jinglong lakloi ban ai ia ka jingiatreilang pura bad ruh ban don ha syndah bad ki bor pyniaid District ha kino kino ki jingdonkam ha kum kane ka por kaba kum ka District bad ka Jylla baroh kawei ka mad ia kane ka jingeh bad donkam ban ai ka jingtreilang jong baroh ki paidbah nongshong shnong ka thain.

‘Lada naka liang ka district administration ka don kam ia kane kano ka jingiarap, kum ka seng ngi long kiba la kloi ban leh katba kaba ngi lah ei, la ka dei ban ngi hap ban mih shakhmat ban ai ka jingshakri ka jongngi na ka bynta ka jingbha jong ka imlang ka sahlang hi baroh kawei’ la ong u samla Kharkamni.

U la pyntip ruh ba baroh ki tnad treikam jong ka seng ha ka jylla la bthah ba kin tynrong lem ia kane ka lyngkor kaba khia lem bad ki bor pyniaid District, ki bor ba dei khmih ia ka tnad jong ka koit ka khiah bad ruh ryngkat ryngkat bad ki bor pyniaid shnong.

U la ong ruh ba lada donkam, ki bor jong ka tnad ka koit ka khiah ha ka District ki lah ruh ban shimti bad pyndonkam ia ka kali kit nongpang (ambulance) jong ka seng na ka bynta ka bha ka miat bad k jingbit jong ki paidbah ha kum kane ka por kaba kynduh jingeh.

Ha kajuh ka por u la ong ba kum ka seng ka buh ruh ia ka jingkyrpad ruh ia baroh ki nongshong shnong ka Ri Bhoi District bad jylla hi baroh kawei ba kin ai iaka jingiasnohkti lang bad ki bor pyniaid District da kaba burom iaka jingai curfew, ban nym mih sha surok katkum ba lah bthah bad kyrpad rit ruh ia baroh ki samla pule bad ki paradoh parasnam kiba lah wan na bar jong ka jylla ba kin shim khia ban register kyrteng ialade ha ka website www.meghalayaonline.gov.in/covid lane kin phone sha ki nombar 8787520449/ 1077 kumba la bthah da ki bor pyniaid District kum shi bynta ban iada na ka jingsaphriang jong u khniang jingpan COVID-19 ha ka imlang ka sahlang.

Kyntang ia iawai, u la iathuh ruh ba ka seng ka la bthah ia baroh ki shnat trei kam jong ka seng ha baroh ka District bad khamtam ha ki thain khappud kum ka Byrnihat, Khanapara, Umsiang, Ranibari, Umden, Mawlasnai bad Patharkhmah bad kin long kiba peitngor ba kin nym don ki briew kiba pynkhein iaka ka ain bad kiba wan rung kyrthep ha kum kane ka por.