Ban wanrah iaka shongsuk pynlong ka Loomsooiung da ka prokram jingpynsngewthuh iaki nongshong shnong

Syllad | The Rising MeghalayaAugust 4, 2024

Ban wanrah iaka shongsuk snongsain hapoh ka shnong bad ban pynneh iaka khuid ka suba, ka Dorbar Shnong Loomsooiung, Newhill, Jowai haka 3 tarik Nailar kala pynlong daka jingialang kyrpang naka bynta ki trai iing kiba ai iingwai.

U Waheh shnong Ma Evermore Suchiang, ula kren ha kaba iadei bad ka thong jong ka jingialang katba kiwei pat ki dkhot ka dorbar shnong kiba kynthup iaka Kong Phidalia Toi bad Ma Scofield War Nongbri kila kren halor ka shongsuk shongsain bad ka jingkhuid jingsuba hapoh ka shnong ka thaw.

U Ma Evermore Suchiang ula kyntu ia baroh ki trai iing kiba ai iingwai ban burom iaki ain bad kyndon jong ka Dorbar Shnong bad ha kajuh ka por ruh ban iatreilang bad ka Dorbar Shnong na ka bynta ka bha ka miat, ka imlang sahlang jong baroh ki nongshong shnong.

Ka Kong Toi kala iaroh iaka Dorbar Shnong iaka sienjam ba la shim na ka bynta ban shngain lang baroh ki nongshong shnong hapoh u pud u ang jong ka shnong khlem da khein ne wanrah ka jingsngewpher.

Kala kyntu ia baroh ban iaburom markylliang, ban ia burom para briew khlem da khein iaka jingiapher jaitbynriew, iapher ka niam ka rukom namar ka lynti jong ka jingshongsuk shongsain ka shong ha kita.

Haba kut ka jingialang u Ma Leborki Passah, General Secretary, Dorbar shnong Loom Soo Iung Newhill ula ai ki kyntien khublei.