Ban ym buh jingeh ia ki paidbah: Da ka SOP yn wanrah ka Sorkar ia ka jingpynpah siren, tah iit iong kali

Syllad | The Rising MeghalayaNovember 22, 2024

U Myntri Rangbah ka Jylla u Conrad K Sangma ha ka 22 tarik Naiwieng u la pynbna ba ka Sorkar kan wanrah shen da ka Standard Operating Procedure (SOP) halor ka rukom pyndonkam ia ki siren, ban pyrkhing ia ka jingtah iit iong bad pyndait ia ki light kiba pynthaba ha ki kali khnang ba kan ym ktah ia ki paidbah.

U CM u la ong, “Nga la ioh pdiang ia shibun ki jingujor bad ki jingsngewkhia na ka liang ki nongshong shnong halor kaei kaba ki briew ki khot ka VIP Culture. Ka long da shisha ka kam kaba sngewkhia, hynrei ngin hap ban khmih bniah halor kane na kiba bun ki liang.”

“Ka don ka jingsngewkhia halor ka jingshngain bad jingiada ia kaba ym dei ban pyniakhleh bad ka kam kaba dei ban leh. Ka jingshngain bad ki lad jingiada ka dei kawei ka bynta kaba ngi sngew ka long kongsan bad ka bym dei ban iapein. Hynrei lada kata ka jingsngewkhia halor ka jingshngain bad jingiada ka kylla long pynban kum ka rongphong bad pyndonkam ha ka rukom ka bym dei, kane nga tharai ka dei kata ka jingeh,” u la bynrap.

Kumta u la ong ba ka long kaba kongsan ban pyniaid ia kane ka bynta ha ka lynti kaba dei. U CM u la pyntip ba ha ka taiew ba la dep u la don ka jingialang bad u Symbud Myntri Rangbah uba khmih ia ka kam pohiing (Police) u Bah Prestone Tynsong, u Chief Secretary Bah DP Wahlang bad ka Director General of Police Kong Idashisha Nongrang ha kaba la bthah ia ka Tnad pulit ba kan pynkhreh ia k SOP ban pynshai mano ba lah bad mano bym lah ban pyndonkam siren, tah iit iong bad pyndait ia ki light kiba pynthaba ha ki kali.

“Hadien ba la dep pynkhreh, ngin sa pyntreikam thikna ia ka SOP kynthup ia ki kyndon kiba hap ban bud haba pyndonkam ia ki siren, ki light ba pynthaba bad kiwei pat ki jait tiar,” ong u CM.

U CM u la ong ruh ba ia kane ka SOP yn sa wanrah ha ka jingialang ka kynhun Myntri ha ka taiew ban wan. “Ngin sa wanrah ia ka SOP kaba pyrkhing bad ba mano kiba lah ban pyndonkam siren, tah iit iong bad pyndait ia ki light pynthaba ha ki kali, hangno ki lah ban pyndonkam bad kumno ki dei ban pyndonkam.”

Hynrei, u la ong ba ka kam kaba iadei bad ka jingshngain bad ki jingiada ruh ka dei ka mat kaba sngewkhia shibun.Ki don ki kyndon kiba donkam ban hap ban bud na ka bynta kito ki heh ki hain kiba hap ha ki kyrdan bapher bapher kum ki Z Plus, Z bad Y, bad kine ki dei ki kyndon kiba la batai bniah bad ia ki bym lah ban ia pein.

“Kine ki bynta ki dei kiba donkam ban hap pynbiang tarajur. Kumba nga la kdew, da kaba buh ia ka jingshngain bad jingiada, ngi hap ban khmih ruh ban pynthikna ba ym dei ban pyndonkam bakla ha kata ka rukom ka ban long ka jingpyndik ia ki paidbah. Ka jingpyniabiang ia kine ki ar bynta ka long kaba donkam,” ong u CM.

“Ngi kyrmen ba lyngba kane ka SOP ka ban sa mih shen bad ka ban sa ioh jingmynjur da ka kynhun Myntri ngi dei ban lah ban pynduna ia ki jingpyndik ia ki paidbah,” bynrap shuh shuh u CM.