Banjur ka JSU iaki kmie ki kpa ban kiar ban phah kam iaki khun ha ki jaka paidbah

Syllad | The Rising MeghalayaJuly 31, 2020

Ka Jaiñtia Student Union (JSU) central body kala kyntu ia baroh ki longkmie longkpa hapoh ka Rilum Jaiñtia ba kim dei ban pynshlur iala ki jong ki khun ki kti ne ia ki hep rit kiba dang hapoh ka 12 snem ka rta ban phah thied jingthied sha iew sha hat bad ki jaka bun briew ha kum kane ka por ba iakhun pyrshah bad ban pyndkut ia u kynjri jong u khniang coronavirus.

Ka JSU ha u kyrwoh bala phah da u Publicity Secretary JSU T Mukhim, u la ong ba kila lap bun ki khynnah ki mih shabar bad ha ki jaka paidbah wat kum kane ka por ba iakhun pyrshah iaka khlam. Ula ong ki kmie ki kpa ki dei ban kiar ban phah kam iaki khun sha ki jaka paidbah kumjuh la kyntu ia kiba la rangbah kiba la iaw ka rta ki dei ban kiar na kaba mih sha ki jaka paidbah.

“Ka jingpang khlam COVID-19 ka la nang jur bad nang pur sted bha katba dangmih ki sngi bad baroh ngi dei ban bud ryntih iaka jingbthah jong ka sorkar bad ka tnad ka koit ka khiah ban jop iaka khlam,” ong u Mukhim.