Baroh ki 60 ngut ki MLA ki dei ban iatai sani ban pynurlong noh iaki jingdawa u paidbah: KSU

Syllad | The Rising MeghalayaSeptember 21, 2023

Ka Khasi Students’ Union (KSU) lyngba ka IT & Publicity Cell jong ka, ka la kyntu ia baroh 60 ngut ki MLA ba ki dei ban iatai sani shuh shuh kumno ban pynurlong ia ka jingdawa jong ki paidbah ban pyntreikam ia ka ILP ha ka jylla Meghalaya bad kumno ban pynbor ia ka sorkar pdeng ba kan pynurlong noh khlem da pynsahteng shuh.

Ka Autumn Session (Dorbar Synrai) jong ka iing dorbar thaw ain ka jylla Meghalaya ka la iaid shaid shaid bad shibun ki mat ki huri hura la iohi ba la iatai. Ka KSU ka pynpaw ia ka jingkmen ha kaba mynne ka sngi u MLA ka Nongpoh u la wanrah ha khmat ia ka mat ILP ban ioh jingshai na ka sorkar. Ban pynkynmaw ka mat ILP lane Bengal Eastern Frontier Regulation 1873 ka dei ka mat dawa kaba la rim bha bad kaba dang im bad khluit haduh mynta. Ha shwa ban ioh ia ka jylla, ka United-Khasi Jaintia Hills District Council ka don ia kane ka kyndon ain ILP bad wat naduh ki por ba synshar ki phareng ka Bri U Hynniewtrep ka don ia ka ILP hynrei naduh ba ioh ia ka jylla riewlum, ka ILP ka jah kum kawei na ki ain kane ka jylla thymmai.

Dang ha u bnai ba la dep ha ka por ba pynmih ia ka thup ki samla pule ba ioh bhah ban leit pule MBBS, la shem ba ha ka Open Category, don haduh kumba 8 ngut ki bar jylla kiba ioh ban rung ha kane ka Category. Lyngba ki jingwad bniah bad ka RTI, ka seng ka la shem ba kine ki 8 ngut ki bar jylla ki khlem pynbiang ki kot ki sla ban pynshisha ba ki dei ki nong Meghalaya ba pura. Katkum ka kyndon jong ka tnad DHS, baroh ki samla pule ki dei ban ai ia ka Permanent Resident Certificate ban pynshisha ba ki dei ki nong Meghalaya, hynrei la shem pat ba katto katne na kitei ki 8 ki khlem ai ia ka PRC hynrei ki ai pynban da ka Provisional PRC kaba treikam tang 3 lane 6 lane 12 bnai. Ka KSU ka sngewdei ba ka iingdorbar thawain ka dei ban iatai bha khnang ban lah ban khanglad ia kitei ki 8 ngut ki bar jylla bad kumjuh ban lah pynduh jait syndon ia kum kine ki jingjia ha ki snem ban wan.

Nalor kata ka seng ka kyntu ruh ia baroh 35 ngut ki MLA Khasi ba ki dei ban ia kren ruh ia mat ban ioh rung ka ktien Khasi ha ka 8th Schedule. Ka iingdorbar thawain bad ki paidbah ki dei ban ioh jingshai ba balei tad haduh mynta khlem pat lah ban pynurlong ia kane ka jingangnud.  

Nalor kata ka Seng ka pynpaw ruh ba u drok u dei u jingdih uba pynjot ym tang ia ka longrynieng u nongdih hynrei u ktah ruh ia ki iing ki sem, ka imlang sahlang bad ka shongsuk shongsain. Lyngba ka jingkyrni dih drok bun ngut ki samla Khasi ki la jot ka jingim, ki longing ki la pra kaba pynhiar pat ia ka kiew ka roi ka Jaidbynriew. Ki kam bymman ruh kiba laiphew rukom bad kiba shyrkhei ki ju jia namar ka jingkhaii bad dih drok. Ka jingdih drok hapdeng ki samla Khasi ka kiew arted bad syndet hapdeng kine ki 15 snem, nyngkong ka sdang shwa na sor Shillong hapoh ki shnong kiba ym ju bna bad ym ju don nongdih drok, mynta pat ka la ksam shaduh kiwei ki district bad sha nongkyndong. La iohi ba ka la don ka jingioh kem khah khah ia ki briew na kiwei ki jylla thain shatei lam mihngi bad kumjuh ruh ki briew na jylla khamtam na East Jaintia Hills kiba thmu ban pynrung ia u drok bad khaii hapoh kane ka jylla.

Ka jingioh kem ia kine ki briew ka pynpaw ruh ba lyngba ka jingioh kurup ia u drok la shem ba la pyrshang pynrung da ki spah kilogram ban khaii hapoh ka jylla. Halor kane ka KSU ka kyntu jur ia baroh 60 ngut ki MLA ba ki dei ban ia tai sani bha halor kane ka mat bad wad lad kumno ban tehlakam ia ka jingrung kyrthep u drok ha ka jylla bad kumjuh ruh ban thaw ain kiba pyrkhing bad ba khlain bor ban pynshitom ia ki nongkhaii drok khnang ban lah kum shi bynta ban khanglad ia ka jingkhaii bad dih drok ha jylla. Lada ki nongmihkhmat ki khein sting ka mut kan ym slem shuh bad ka jylla Meghalaya kan long kum ka Phillipines, Colombia, Mexico bad kiwei ki thain kiba la shah lynshop ha ki kam sniew lyngba u drok.

Ka jingpyrshang khah khah ka North East Frontier Railways ban wanrah ia ka lynti rel ha Ri Khasi ka la pynbitar ia uba bun balang namar lyngba ka rel, la sngewthuh shai ba ki bar jylla ki mynder ri kin ioh rung suk ban buhai shnong hapoh jylla. Ka KSU ka sngewdei ba ka iing ka dei ban iatai halor kane ka mat bad ba dei ban khanglad beit ia ka lynti rel ban wan shane tad haduh ynda la ioh ia ka ain ILP ha jylla, ha kata ka por yn sa ia pynbeit pat halor ka jingwanrah ia ka rel sha Ri Khasi.

Nalor kata ka KSU ka la pynpaw ruh ba ki paid Khasi na ka por sha ka por ki shah thombor bad shah pyniap ha ki thain khappud ha ki bor sorkar Assam bad kiwei kiwei ki kynhun. Naduh ka jingshah siat iap ki 4 ngut ki Khasi ha Langpih, ka jingshah pyniap dusmon u Bah Tyngshain Mukhim ha Block II, ka jingshah siat iap haduh 5 ngut ki Khasi ha Mukroh bad ki jingshah pyndik ba dang shen ha Khanduli bad Lapangap. Lada ki 60 ngut ki MLA kim iatai ia ka mat khappud hapoh iing dorbar thaw ain kan pyni ba ki khein sting ia kane ka mat bad kumjuh ruh ba kim khein snep ia ki paidbah ba sah ha khappud. La donkam ban pynbeit kyrkieh noh kumno ban ai jingiada ia ki paid Khasi kiba sah ha khappud ban lait na ka jingshah thombor khah khah ha ki pulit Assam, ki lehnoh bad runar Nepali bad Karbi.

Na ka liang ka KSU ka kwah ruh ia baroh ki MLA ban iathir halor ka National Education Policy, kumjuh ruh ia ka jingslem ban sdang ia ka Shillong Medical College bad ka jingkyntiew kyrdan ia ki baroh ki Polytechnic Insititutes sha ki Engineering College kiba pura. Kumjuh ruh ka jingbymdon ka State University ka la ktah bah ia ki samla pule ka jylla kiba thrang ban bteng shuh shuh ia ki jingpule. Ka KSU ka kyntu ruh ia ka iing dorbar thaw ain ban iatai ruh halor ka mat ban wanrah ia ka Central Agricultural University hapoh Kyrdemkulai kaba la sahteng naduh u snem 2010.

Shuh shuh ka KSU ka kyntu ruh ia ka iingdorbar ba ka dei ban wad lynti noh mar mar ban weng ia ki kharmetor na Them Iew Mawlong namar kane ka mat ka la sahteng da ki bun bun snem bad lada sahteng kumne ka mut kine ki briew ki la sngew baheh shuh kumba la jia ha kine ki khyndiat bnai ha kaba kine ki runar kharmetor ki la rah da ki tiar ialeh ban shoh pynmynsaw ia ar ngut ki draibar taksi kiba dei ki Khasi ha Khyndai lad.