Beh ia u doktor kynshlein kynthei, ong ka KSU iaka tnad ka koit ka khiah

Syllad | The Rising MeghalayaApril 3, 2025

Ka Khasi Students’ Union (KSU), West Jaintia Hills Dstrict haka 3 tarik Iaiong kala dawa na ka tnad ka koit ka khiah ban beh mardor ia u doktor kynshlein kynthei ha kawei na ki jaka sumar paidbah.

Ka KSU kala ong ba kala ioh shibun ki jingujor ha kaba iadei bad uwei u doktor uba la shah kynnoh ba u kynshlein kynthei. Ka KSU kala kynnoh ba une u doktor ula leh shibun ki kam kaba kum ki riew kynthei bad ka imlang ka sahlang kam lah ban pdiang.

Ka jingdon une u doktor ha katei ka jaka sumar ka pynsyier mynsiem ia kiba bun ki nongpang bad kim sngew shngain wat tang ban leit phah sumar ne wad jingsumar na katei ka PHC, la ong ka KSU bad bynrap ba ka iai ap ba ka tnad ka koit ka khiah kan leh eiei pyrshah ia une u doktor, pynban wat hadien bun bun bnai kam don kano kano ka jingshimkhia na ka tnad ka koit ka khiah.

Ha kajuh ka por ka KSU kala dawa ruh ban pynshna iaka surok ban rung sha ka Namdong CHC kaba la sniew shaba palat.

Ka KSU kala ong ba kala dep ban ai jingthoh war sha ka myntri koit ka khiah ka sorkar jylla, hynrei haduh mynta ym shym la shna iaka surok.

Na kaliang ka KSU kala ai da ka jingthoh ha ka DMHO, West Jaintia Hills bad kyntu ban tuklar lem halor kine ki ar tylli mat ban myntoi ki paidbah khamtam ki longkmie kiba pun ba kha.