Beh ka lyer sngewtynnad sha ka bom 17 ngut ki MLA ki kwah iakhun na UDP ong u Jemino

Syllad | The Rising MeghalayaMay 21, 2022

Ka lyer kaba sngewtynnad ka beh sha ka bom bad ha u snem 2023 ngi kwah baka UDP kan ioh thaw iaka sorkar, la ong u Bah Jemino Mawthoh haba kren haka jingialang pynskhem iaki Youth Wing ka UDP East Jaintia Hills ha Sohkymphor haka sngi Saitjain.

U Bah Jemino Mawthoh general secretary ka UDP haba kren shuh shuh haka jingialang ula ong “Kala don ka jingkylla kala saiñ himai sima ha kane ka jylla bad ngi iohi ba ka lyer kaba sngewtynnad, ka beh sha ka UDP bad 17 ngut ki MLA mynta kiba kwah ban iakhun na kane ka party UDP bad kane ka dei ka lyer kaba phylla kaba wan ban beh ha kane ka jylla bad ngi don ka jingkhmih lynti ba ha u 2023 kan don ka jingkylla.”

“Haoid mynta ngim lah lait na kane ka sorkar khleh khaw lang ka MDA kaba ialam da ka NPP, nga khmih lynti ba ha u 2023 kan ialam pat da ka UDP,” la ong u Bah Jemino.

“Ngam shym poi pyrkhat ba ka party Congress kaba la ju kop man la ka por ba kadei ka party kaba long discipline, hynrei kane ka skum jong ka Congress mynta ka la pra phom baroh 17 ngut ki MLA na ka seng Congress kila sakma bad ki la ïapoi shane bad shatai. 12 ngut ki la poi shaka TMC bad 5 ngut ki kan sdang ban khih khohreh ban leit na kiwei pat ki party,” ong shuh shuh u Bah Jemino.

“Ngim kwah ba ka Jylla ka jong ngi kan long kum ka ri Sri Lankan haba phi peit haki television phi iohi kaei kaba jia iaka Sri Lanka ha kaba wat ka petrol, marbam mardih bad ka kot sada ruh shitom ban ioh,” la ong u Bah Jemino kaba lyngngoh um shym la pynshai bha halor ka Sri Lanka ne kynthoh eiei pat iaka MDA katno ngut ba ialam iaka?

U Bah Embhah Syiemlieh MLA barim ula ong “Ngi la ioh la ioh chief minister nangtei na rilum Garo bad ka la dei ka por ba ngin pynthikna noh ba naduh ka snem 23 shaneng ngin pynthikna da ka jingiatreilang u Chief Minister udei noh na kane ka rilum Khasi Jaintia.”

“Ngi khmih lynti hapoh ka jingialam jong u Bah Metbah kum nongialam rangbah duh jong ka party ngin iohi ba un don haka shuki kum u Chief minister jong ka Jylla ka jong ngi,” la ong u Bah Embhah.

U President ka UDP Bah Metbah Lyngdoh hashuwa ban kren ula pynskhem bad ai ka jingkyrkhu kyrdoh bad kitbok kitrwiang iaki nongkitkam ka UDP Youth Wing East Jaintia Hills ba trei shitom iaka lyngkor kaba kiba la kit ban pynkhlain iaka party.

“Nga sngewkmen ban iathuh ba kumba long mynta ka jingkhih win ka saiñ hima sima, wat sha ka thaiñ Garo ka party UDP kaba ki juh ong ba kadei ka party kaba don tang sha Khasi Jaintia mynta la sdang ban wad iaki nongialam jong ka party UDP,” la ong u bah Metbah bad ula ong shuh shuh ymdei tang katta ngi la dep rai ruh kumba 4 ngut bad 5 ngut ki seating MLA kin iakhun na ka party UDP namar ba kila iohi baka don ka jingtylli haka synshar khadar bad nga sngew ba kadei ïa ngi kum ka party UDP ban ialam iaka jingsynshar haka state ka jong ngi.”

Kiwei kiwei kiba kren ki kynthup ia u Ma Moonlight Pariat president UPD West Jaintia Hills, U Ma Kyrmen Shylla UDP Youth Wing ka Jylla, U Ma Coming Tlang president UDP District Youth Wing bad kiwei kiwei.