Beh seng ka VPP ia u kyrtong na East Shillong namar ki kam kren pyrshah party

Syllad | The Rising MeghalayaApril 20, 2024

Ka liang pyrshah Voice of the People Party (VPP) haka Saitjain ka la beh seng noh ia u dkhot ka State Executive Committee jong ka namar ki kam kynthoh pyrshah party ki jong u.

U Avner Medon Pariat uba dei ruh u kyrtong ka VPP uba iakhun pyrshah ia ka MLA ka East Shillong kaba dei ruh ka Myntri sorkar ka Kong Ampareen Lyngdoh ha ka ilekshon Assembly 2023, u la shah kynnoh donkti halor ki kam kynthoh pyrshah ia ka party bad iashah ia kawei pat ka party sain pyrthei lyngba ki rynsan social media.

“Kumba la hukum da ka State Executive Committee, ngi pyntip sha phi ba ka party ka la shimkhia ha kaba iadei bad ki jingkynthoh ba dang shen ki jong phi pyrshah ia ka party na ka bynta ban pynpaw jingkyrshan ia kawei pat ka party sain pyrthei lyngba ki rynsan social media kaba long kaei kaei ka bym lah ban pdiang na ka bynta u State Executive Committee,” ong u Chairman ka VPP disciplinary committee, u Dr Kara H Shen ha ka shithi beh seng sha u Bah Pariat.

“Ka jingkren bad ka jingpynpaw ka jong phi ka la pynjah burom ia ka party bad pynduh mynsiem ha ka jingialeh ka jong ngi ban pynkhlain ia ka party.Kan ka kam ialeh pyrshah seng ka jong phi ka la pynlong ia ngi ba ngin ym don da kiwei pa ki lad ki lynti hynrei ban beh seng mardor,” ong u Dr Shen