Beh seng ka VPP sa ia u kyrtong MLA bad ia u working president na Mairang

Syllad | The Rising MeghalayaApril 23, 2024

Ka liang pyrshah Voice of the People Party (VPP) haka 22 tarik Iaiong, ka la beh seng noh sa ia u kyrtong MLA bad ia u Working President napoh Mairang halor ki jingkynnoh ialeh pyrshah  party ka jong ki.

U Bah Shanlang Warjri uba dei u kyrtong MLA napoh Mairang bad u Bah Kherup Sing Thabah uba dei u Working President ka Mairang Circle ki la shah beh noh na ka Seng lyngba ka shithi ba la phah da ka State Executive Committee jong ka party.

Ha kane ka shithi beh seng, u Chairman ka VPP disciplinary committee u Dr Kara H Shen u la ong, “Kumba la bthah da ka Executive Committee, ngi kiba soi kyrteng harum ngi pyntip sha phi ba ka party ka la shimkhia ia ki jingkren, ki jingleh bad ki kam ki jong phi kiba long pyrshah kum ki dkhot jong ka party. Hadien ba la bishar bniah ia kine ki jingleh jingkam ki jong phi, kine hi ki la paw shai kdar ba ki long pyrshah ia ki nongrim ka party ka jong ngi.”

Kine ki jingleh ki jong ka pynlong ia ngi ba ngin ym don da kiwei pat ki lynti hynrei ban beh seng noh mardor ia phi na ka party” u la ong.

Kane ka la wan long ruh tang ar sngi hadien ba ka Seng VPP ha ka 20 tarik mynta u bnai  kala beh seng noh  ia u dkhot jong ka State Executive Committee namar ki jingkren kiba long pyrshah ia ka party.

U Bah Avner Medon Pariat, uba dei u kyrtong ka VPP uba iakhun pyrshah ia ka MLA ka East Shillong bad Myntri Sorkar Kong Ampareen Lyngdoh ha ka elekshon 2023, ula shah beh seng halor ka jingkynnoh kren pyrshah ia ka party ha ki rynsan social media bad iaroh ia kawei pat ka party.