Beh thong ki pulit ia ki kali ba phet na ka jingtalasi ha Umroi, ioh kurup haduh 236 kilo u kynja

Syllad | The Rising MeghalayaJuly 24, 2024

Ki pulit napoh Umroi PIC ha ryngkat ka kynhun Anti Narcotic Task Force (ANTF) ha ka step phyrngab jong ka 24 tarik Naitungi ki la ioh ban kurup haduh 236.89 kilo u kynja na kawei ka kali ha ka surok bah NH-44 ha Lumdiengngan Umroi bad kem noh ia uwei uba donkti hadien ka jingbeh thong kaba la neh kumba katto katne por.

Na ka liang u Superintendent of Police ka Ri Bhoi District, lyngba u kyrwoh u pyntip ba hadien ba ki la ioh ia ka jingtip kaba thikna, ki bor pulit ki la pylong ha ka jingpynap shrip bad ka jingtalasi ha ka por kumba 3:05 mynstep hadien ba ki la ioh ban bat noh ia artylli ki kali Pickup kiba don ia u registration No. TR 05 F 1909 bad TR 04 D 1920. Ha ka jingtalasi ki pulit ki la lapdien haduh 45 tylli ki song jong u kynja uba khia haduh 236.89 kilo.

Hashwa ba ki pulit kin pynlong ia kane ka jingtalasi kawei na kine ki kali ka la phet krad sha ki thain Bhoirymbong bad kawei pat sha ka thain ka shnong Umeit, bad hadien ka jingbehthong la ioh ban bat noh ia baroh ki artylli ki kali.

Hynrei u nongniah bad u nongiarap jong ka kali No. TR 05 F-1909 ki la ioh ban phet krad hapdeng ka jingdum sha ka jaka khlaw ba marjan, katba u nongniah jong ka kali No TR 04 D 1920 uba kyrteng u Supan Chakma, 25 snem rta uba dei na ka shnong Unakoti, West Tripura u la shah kem noh.

Na ka liang ki bor pulit ki la register case ia une u briew ba la shah kem hapoh ki kyndon ka NDPS Act hapoh Umiam PS bad ka jingtohkit mynta ka dang iaid shakhmat ban lapdien shuh shuh ia ki kam beain jong ki.