Bhah ka sorkar sa 1.4 akar ka jaka ban pynkynriah ia ki Harijan na Them Iew Mawlong

Syllad | The Rising MeghalayaDecember 7, 2023

Ka sorkar Jylla ka la shim ia ka rai ban bhah sa 1.4 akar ka jaka na ka bynta ban pynkynriah ia ki 342 tylli ki longiing Harijan na Thew Iew Mawlong, kata da kaba pynpaw ruh ka jingsngew skhem ban lah ban weng noh ia kane ka jingeh kat haduh ka taiew kaba ar jong u bnai Kyllalyngkot 2024.

Ia kane ka rai la pynbna hadien ka jingialang ba la khot pynlong da u Symbud Myntri Rangbah (Dy.CM) ka jylla uba khmih ia ka Kam Pohiing u Bah Prestone Tynsong bad u Dy.CM uba khmih ia ka Tnat Urban Affairs u Bah Sniawbhalang Dhar bad ki nongmihkhmat na ka Harijan Panchayat Committee (HPC), ba la synran ruh da ki dkhot jong ka Delhi Gurudwara haka 7 atrik Nohprah ha Secretariat.

Haba kren sha ki lad pathai khubor, u Bah Tynsong u la ong ba kane ka jingialang ka la long kaba iaid beit iaid ryntih bad seisoh. “Hynrei, hashwa ban pynkut ngi la ailad sa shisien ia ki ba kin iamir jingmut lang hapdeng jong ki. Hadien ba kila dep ban leh ia kane ngin pynbeit ia ka por ha lane shwa ka taiew kaba ar jong u bnai Kyllalyngkot u ban wan ha kaba ngin iakynduh biang sa shisien ban shim ia ka rai kaba khatduh ha kaba iadei bad kane ka bynta,” u la ong.

“Namar ba ka HPC ka la pynpaw ia ka jingsngewkhia halor ki katto katne ki mat ia kiba ki dei ban iakren hapdeng jong ki, kumta ruh ngi la ailad ia ki da kaba kyntu ruh ba kin pyndep noh ha lane shwa ka taiew ba ar jong u bnai Kyllalyngkot shwa ba ngin iakynduh biang,” ong shuh shuh u Bah Prestone.

Haba jubab ia ka jingkylli, u Bah Tynsong u la ong ruh; “Ka blueprint ba la pynthymmai ka long kumne, ka ophis kaba la don lypa jong ka municipal board ngi don kumba 2.14 akar ka jaka, hynrei namar kam pat biang na ka bynta baroh ki 342 tylli ki longiing, kumta ngi la bhah biang ka jaka kaba long sa kumba 1.4 akar.