Bishar bniah biang u Dy CM halor ki 4 tylli ki project surok ba pyntrei da ka NHIDCL ha ka Jylla

Syllad | The Rising MeghalayaJune 12, 2024

U Symbud Myntri Rangbah ka jylla uba khmih ruh ia ka Tnat PWD (Roads) u Bah Prestone Tynsong ha ka 11 tarik Jylliew u la khot ia ka jingialang ban bishar bniah biang halor ka jingshna ia ki sawtylli ki project surok da ka Tnat National Highways & Infrastructure Development Corporation Ltd (NHIDCL) hapoh Rilum Khasi-Jaintia bad Garo.

Haba kren sha ki lad pathai khubor hadien ka jingialang, u Bah Prestone u la pyntip ba ka jingsor jamin na ka bynta ka surok four lane na Mawlyngkhum, Umiam sha Panchgram, Assam ka dang iaid shakhmat.

“Ka NHIDCL ka la dep ban pyntip sha ngi ba ka jingsor jamin ka la iaid shakhmat ia ki jaka bad ka committee hapoh ka jingialam u DC ka East Khasi Hills ka la treikam bha ha kaba la khot ruh khah khah ia ka jingialang bishar kam ioh ka don kano kano ka jingeh kaba iadei bad ki trai jaka lane ki Raid ki Hima ha kaba ka committee kan shim ia ki sienjam ban weng ia baroh kine ki jingeh,” ong u Dy.CM.

“Kumjuh ruh ha West Jaintia Hills bad East Jaintia Hills, ki Deputy Commissioner ki la don hapdeng ka kam bad pynlong khah khah ia ki jingialang hapoh la ki jong ki district ban weng ia ki jingeh kiba mih. Kumba nga ong ha phi haba ka jingsor jamin ia ki jaka ka dang iaid shakhmat ngi tip kino ki trai jaka kiba pyrshah ban ai jaka ne kano ka shnong kaba pyrshah ban ai jaka, bad haba mih kum kine, ki DC kin sa lum ia ki jingialang bad iamir jingmut bad ki trai jaka lem bad ki bor pyniaid shnong khnang ban weng ia ki jingeh,”ong u Bah Prestone uba la bynrap ruh da kaba ong, “ba kane ka jingsor jamin ka long kaba iaid beit iaid ryntih bad nga ngeit skhem ba shen kin lah ban pyndep ia kane ka bynta bad halor ka jingpynkhreh ban siew ia ki bai jaka.”

Da kaba pynpaw ba ki surok four lane ki dei kawei na ki project kaba kongsan tam na ka bynta ka Meghalaya, u Bah Prestone u la ong, “Dei tang kane ka project ia kaba ngi khot ka NorthEast corridor project, kaba la dep lypa ban kynthup ha ka mission 2047 da ka sorkar NDA.Na ka liang ka sorkar Jylla ngi kwah ban pynthikna ba kane ka project kan long kaba iaid beit iaid ryntih tad haduh ban da aiti ia ki jaka sha ka NHIDCL na ka bynta ban pyntrei ia ki surok four lane.”

Ha kaba iadei bad ka surok Shillong Western Bypass, u Symbud Myntri Rangbah ula iathuh ba u DC ka Ri Bhoi ula sdang ban sam ia ka bai jaka sha ki trai jaka.

“Ngi la dep lypa ban kynjoh sha kumba 85%, kata satang kumba 5-6 % hapoh kane ka taiew ngin kynjoh sha ka 90%.Ha ka juh ka rukom u DC ka East Khasi Hills ruh u la pyntip ba ia mynta ki la dep ban aiti ia ka jaka haduh 70-75 % bad hapoh kane ka taiew kin sa lah ban tam ia ka 90%,” u la ong.Nalor kata u la bynrap ruh ba shisien ba la dep ban aiti ia ka jaka kaba la kot sha ka 90%, ka NHIDCL kan sa aiti noh ia kitei ki jaka sha ki kompeni ba kin sdang noh mardor iaka kam ban shna surok.

Kumjuh ha kaba iadei bad ka Dainadubi-Darogre-Williamnagar Junction Road, u Dy.CM ula ong ba katei ka projek kan sa sdang noh mardor hadien ba la pyndep iaka jingaiti ia ka jaka da ka tnad Forest na ka bynta ka Compensatory Afforestation. Hynrei ula pyntip ba ki trai jaka kin sa aiti noh ia ka jaka jong ki ha ki katto katne ki bynta kumba 2.5 km haduh 3 km ha kaba iadei bad ka Tura-Dalu Road.

Shuh shuh u Dy.CM u la ong, “Nga la bthah ia u Deputy Commissioner ka Tura ban pynsted ia ki kam kiba sahteng bad ki trai jaka bad ka District Council khnang ba yn lah ban shimti noh ia ki jaka. Mynta ki kam ki jam kila iaid shakhmat hynrei tang ha ka bynta kaba ngim lah ban pyniaid ia ka kam namar ka kam jaka. Nga ngeit skhem ba da ka jingshim rai mynta ka sngi ngin sa lah ban pynurlong noh ia katei ka kam.”