Bishar kam ka DMC, SSA West Jaintia Hills ban peit bniah iaka bha ka miat ki skul

Syllad | The Rising MeghalayaNovember 22, 2024

Ka District Mission Coordinator, SSA -West Jaintia Hills haka 22 tarik Naiwieng kala pynlong iaka Review Meeting ne ka jingbishar kam ha Conference Hall ka ophis u Deputy Commissioner, West Jaintia Hills District.

Iaka jingialang la pyniaid da ka Kong M. Lakiang, DMC, SSA- West Jaintia Hills haka jingdonlang u Bah B.S. Sohliya, Deputy Commissioner West Jaintia Hills & Chairman SSA, West Jaintia Hills, ki Block Mission Coordinator, ki BRP, CRP bad BRP-IE.

Ka Kong M. Lakiang, DMC, SSA West Jaintia Hills kala iathuh shaphang ka SSA bad ki jinglap jingshem haki skul, da kaba kyntu iaki BRP, CRP ban peit bniah iaki skul na ka por sha ka por bad ban kitkhia ruh iaka kamram ha kano kano ka por ba dawa ka kam.

U Bah B.S. Sohliya, Deputy Commissioner West Jaintia Hills & Chairman SSA, West Jaintia Hills ula kyntu ia baroh ban peit bniah bha na ka bynta ka bha ka miat ka pule puthi bad ka jingiaid beit iaid ryntih ki skul ba don hapoh ka District.

U DC u pynpaw ruh iaka jingthrang ban iohi ba ka West Jaintia Hills kan long kawei na ki District kaba kiew bad kane kan urlong da ka jingiatreilang bad ka jingiajan.

Shuh shuh ha kane ka Review Meeting la ia shim bynta ruh ban iakren ia phyliew halor kiba bun ki mat da ki Coordinator bapher bapher kynthup u LK. Singh (IE Coordinator), R.L. Bimee Suwer (MIS Coordinator), Esalan Dkhar, (Planning Coordinator), Pikee Suwer (FAO, SSA), D.Manner (Jr. Engineer, SSA), S. Laloo (Community Mobilizer) bad ki BRP, CRP jong ka Thadlaskein, Laskein bad Amlarem Block.