Bishar u Myntri iaki project tourism ba T.400 klur, yn thung 70 ngut kum ki tourism buddies

Syllad | The Rising MeghalayaOctober 30, 2024

U Myntri ka Tnad Tourism u Bah Paul Lyngdoh ha ka 29 tarik u Risaw u la shong bishar kam ha kaba iadei bad ka jingpyntreikam ia ki project bapher bapher kiba kot palat T.400 klur na ka bynta ban kyntiew ia ki kam jngohkai ha ka Jylla.

Haba kren sha ki lad pathai khubor hadien ka jingialang u Bah Paul u la ong, “Ka jingialang bishar kam ba kongsan mynta ka sngi ka long halor ki kam jngohkai ia kaba phi ia tip halor ka jingkiew sha kawei pat ka kyrdan lyngba ka jingioh jingithuh jong kane ka Nongbah Shillong kum ka jaka kaba ki nongwan shangkai ki jied bha ban wan ha u snem 2025.”

U la ong ruh ba u Commissioner & Secretary bad u Director ki la batai bniah ha u ha kaba iadei bad ki project bapher bapher kiba kot palat T.400 klur ia kiba la pyntrei mynta.

“Na kine, ngi don katto katne ki project ba la bei tyngka da ka Asian Development Bank (ADB) kaba kot T.191 klur bad ruh na ka State Plan ngi la mang ia ka pisa kaba T.227 klur na ka bynta ki jingtei bapher bapher ha kylleng ki jaka ka Jylla Meghalaya,” u la bynrap.

U Bah Paul u la pyntip ruh ba ka Tnad kan sa wanrah noh shen ia ka skhim ba la tip kum ka “tourism buddy scheme” na ka bynta ban thung ia ki khynnah samla ki ban sa ioh ia ki jinghikai ba katto katne por na ka bynta ban pyniaid ia ki kam pahara, btin lynti ia ki nongwan shangkai bad ruh ban pynlong ia ki nongwan shangkai ba kin sngewtynnad bad sngew aram ba kin sah ha ka nongbah Shillong bad kiwei pat ki bynta jong ka Jylla.

“Ngin sdang lyngba ka kynhun jong kumba palat 70 ngut ki samla. Kane kan wan ha ka dur jong ka NIT (notice inviting tender), ia kaba yn pyllait shen da ka Tnad Directorate of Tourism. Ngin sa pynmih ia ka NIT ha kine ki ar lai sngi namar ngi kwah ban iohi noh ia ki ba kin don ha ki jaka kiba dei hapdeng jong u bnai Naiwieng u ban wan namar kane ka dei ka samoi ha kaba ka jingdon jong ki nongwan shangkai ka kiew bha,” ong u Bah Paul.

U Myntri u la  pynbna ruh ia ka rai ban pyntreikam ia ka “Tourism buddy scheme”, khnang ban pynsuk ia ki nongwan shangkai haba ki leit kai sha kylleng ki jaka jong ka Jylla.

Nalor kata u la ong ruh, “Ngin pynthikna ia ka jingiatreilang bad ki Society bad ki Dorbar Shnong bapher bapher ha ki jaka ba khlain ka jingdon ki nongwan shangkai. Kine ki ‘tourism buddy’ kin long kum ki nongbtin lynti, ki nongiarap, ki nongpynkylla ktin bad kin iarap ia ki briew kiba lah ban jah lynti shane shatai.” U la bynrap ruh ba kine ki ‘tourism buddy’ kin kham don ha kito ki jaka ba bun ki nongwan shangkai, kum ka nuksa ha ki thain Laitlum, Ward’s Lake, Mawsmai cave, Arwah cave, Nohkalikai, Dainthlen, Mawlynnong, Mawkdok, Golflink, Shnongpdeng, Kransuri bad kiwei kiwei.

Kumjuh u Myntri u la shong bishar ruh ha kaba iadei bad ka project Shillong ropeway da kaba ong, “Ki kam ki la nangiaid bad hapdeng jong u bnai Naiwieng yn sdang noh ia ka jingpyntrei.”

Ha kajuh ka por u Myntri u pyntip ba ia ka Tamasa ba pawkhmat ba ar sngi kynthih, ka ‘Cherry Blossom’ yn sa wan plie da u Myntri ka Tnad DoNER ha ka jingiadon lang u Myntri Rangbah ka Jylla bad u Myntri ka Tnad Tourism ha ka 15 tarik u Naiwieng 2024.

“Ngi dang ap ruh ia ka jingpynthikna na ka Sorkar Japan ha kaba kan sa phah ia ki heh sorkar ba kin wan iashim bynta ha kane ka Tamasa namar kan dei ruh ka sien kaba nyngkong eh ba ngi la iatreilang bad ka ri kaba na shabar,” u la ong.

Shuh shuh u la bynrap ruh ba ka LIT Festival ruh kan sa long ha ka 17-18 tarik u Naiwieng ha kaba kin sa don ki nongthoh kot ba pawkhmat ki ban wan iashim bynta.