Bitar ki nongialam shnong ka thain Narpuh ba ai report thok ka NHAI sha ki bor District ka EJH

Syllad | The Rising MeghalayaNovember 29, 2023

Hadien ba ai report thok ka NHAI sha ki bor pyniaid district jong ka East Jaintia Hills ha kaba iadei bad ka surok NH-6 naduh Mynkre shaduh Malidor, na ka liang ki nongialam shnong ka thain Narpuh ki la pynpaw ka jingbitar namar katkum ka jinglap jong ki wat tang 10 percent ka jingsiang rong ruh khlem lah ban pyndep.

Kane ka la wan long hadien ba ka ophis u Deputy Commissioner ka East Jaintia Hills lyngba ka Extra Commissioner haka 29 tarik Naiwieng ka la khot ia ka jingialang ia ki Waheh Shnong / Secretary Shnong kiba don ha thain Narpuh na ka bynta ban kyrpad ia ki ban plie noh ia ka Toll Plaza kaba don ha Lumshnong namar kane ka jingkhang khyrdep kaba la neh 3 bnai mynta ka la ktah jur ia jingioh nong ka NHAI.

Hynrei na ka liang ki Waheh Shnong kiba wan sha kane ka jingialang ki la pyneh triang ban ym plie da lei lei ia kane ka Toll Plaza kaba don ha Lumshnong katba ka NHAI kam pat lah ban maramot bad siang rong ne blacktopping ia kane ka Surok NH-6.                       

Ki nongmihkhmat na ka liang ka NHAI ki la ai ia ka report thok sha ka Extra Commissioner ka East Jaintia Hills ha ka jingiadei bad ka jingmaramot ia kane ka surok NH-6 bad ki la kam ba 80% la dep maramot ia kane ka surok, ong u kyrwoh na ki nongialam shnong ka thain Narpuh.

Ki nongialam shnong kiba don ha kane ka jingialang ki la pynpaw ka jingbitar ia ki heh jong ka NHAI namar ka jingthok jingshukor jong ki namar ki kontraktor kiba pyntrei ia kane ka surok NH-6 haduh mynta tang 10% ruh ki khlem lah ban pyndep ia ka black topping.

Kumta na ka liang ki nongialam shnong kiba don ha ka jingialang ki la pynpaw ha ka Extra Commissioner bad sha ki heh jong ka NHAI ba lada kim lah ban pyndep ia ka black topping haduh 80-90% kin ym ailad da lei lei ban plie ia kane ka Toll plaza kaba don ha Lumshnong.

Ki nongialam shnong ki la kyntu ruh ia ki bor pyniaid district ka East Jaintia Hills ban ym ngeit ia kane ka report jong ka NHAI bad nangne shakhmat ki dei ban pan ia ka report na ki nongialam shnong ka Narpuh ruh ha jingiadei bad ka jingtrei siangrong ia kane ka surok NH-6 naduh Mynkre haduh Malidor namar katkum ka jinglap ba ki heh ka NHAI kiba peit ia kane ia kane ka surok ki ai da ka report thok sha ki bor pyniaid district.