Bitar ki sengbhalang ba pyniasyriem u SP ia ka tamasa bad ka jingiaseng bad lympung

Syllad | The Rising MeghalayaMarch 7, 2020

Ki nongialam jong ki sengbhalang bapher bapher ki la mih jyndat ban pyrshah ia ka jingpyniasyriem u SP ka West Jaintia Hills District u Bah Lakordor Syiem ia ka tamasa pyrthei bad ka jingiaseng Synod bad ki lympung.

Kane ka jingjia ka la jia ha ka jingialang bala khot da ki bor pyniaid district bad ki sengbhalang ban iakren halor ka jingpyrshah jong ki sengbhalang halor jingpynlong ia ka Meghalayan Age Festival hapdeng ka jingsaphriang jong ka COVID-19 ha ka pyrthei kaba la long ha DC Ophis Jowai haka sngi Saitjain.

Ha katei ka jingialang la don ka ADC Jowai Kong RS Manner, U SP Jowai bah Lakador Syiem,u DMHO, Jowai, U Director jong ka Tourism u bah CVD Diengdoh lem bad kiwei de.

Ki nongialam jong ki sengbhalang kiba kynthup ia u president ka JSU u bah Lawyerson War,u joint secretary jong ka JSM u bah Pillarstone Phawa, u president jong ka MPUF u bah Dapoiwanmi Laloo bad kiwei de.

Kitei ki sengbhalang ki la pynpaw beit ia ka jingpyrshah ia katei ka tamasa na ka daw jong ka COVID-19 namar kin sa bun briew ha kitei ki jingialang.

U SP u la woh dong ia ki da kaba ong balei kim pyrshah ia ka fete ne wat ia ki lympung bad jingiaseng synod namar ha kitei ki jingialang ruh ki bun briew.

Ha katei ka por ki nongialam sengbhalang ki la bitar shla bad mih jyndat na ka jingialang bad iengskhem ba ki pyrshah ia katei ka tamasa Meghalayan Age namar ba jingsaphriang ka jingpang Corona Virus.