Booh nam ka kur War Mynso dei yung dorbar kur ha Mynso-A

Syllad | The Rising MeghalayaFebruary 13, 2024

Ka Kur War Mynso ha ka 13 tarik Thohlakhmi daioh ko u wai paidbah ya ka Yung Dorbar iong ka Kur wa em ha chnong Mynso A, West Jaintia Hills, Elaka Mynso kawa da chna hei lut wa 45 Lak tam wei kawa da sdang u chna nadooh u snem 2017.

Ha ka yalang wai pyrda ya kani ka Yung Dorbar wa da man hei pynlai u Lionel T. War, Chairman Inauguration Committee da sakhilang leh da u Rev. Dr. Fr. Ioannis War kam u Kongsan, u Rev. B.B.Lamin kam u Symbood Kongsan, u Pa Dolloi ka Elaka Mynso, ki Waheh Chnong wa ki Secretary Chnong ka Mynso A, Mynso B nalor I wan embyntalang ki khon ka Kur najan najngai kani ka sngi daman kawa ioophooh ioophein..

U Chinta War, Secretary Kur War Mynso kam wow kdar luti ya ki bynta wa chakhmat da e u ki kyntien pdiang burom neitae pynbood wan I khana pynsniaw U Jimmy War, Chairman Kur War Mynso yei parom watbian Ka Oor War waman ka Seinjait ka Kur War Mynso wa I lai luti ka Sein Kur hei wow pynkhai pynyien ya ka Yung Dorbar katwa hei pynkut wan u Manlang War, Secretary Inauguration Committee da e u ki kyntien khublei.

U Rev. BB Lamin hei e kyntien kam u Symbood kongsan, da kitbok kitrwiang u ya ka Kur War waroh kawi dei wa ong kyrmen yooluti wa I em kani ka Yung Dorbar Kur u man I kyrkhu wakhroo hei wow ye chooh ka Kur u Saindur saindar yei miat I bha ka imlang sahlang iong ki khon ka Kur ha waroh ki liang.

U Rev. Dr. Fr Ioannis War hawa klam ha kani ka sngi da ong u man iwa sniawsuk sniawkmen ya o wow ioh u yachemlang wa ki para khon ka Kur wamih na ka jooh ka Seinjait “Ka Oor War”.

Ki kyntien chooh Jingmut u Rev. Dr. Fr Ioannis War kiwa da klam da pachat u hakhap u waboon walang ha kam kani ka sngi toh kiwa chim u wow kdar u kdaw kyrpang ya I bynta iong ka Oor War wa U Mookheng-Kheng, kiwa man ka dak ka chin iong I Ya Maia,Yatylli wei Ya burom kylliang.

Chooh chooh heiyatoh wa ka kot chaphang I Parom ka Oor War, ong u I por datoh wow pynjanai chooh ya kani ka Kot khnang wa ka Patein khon Patein Ksu iow lait ko nei wiarnar wiarluti nae chah yalam bakla chaphang ka Seinjait Seinkynja ka Kur War Mynso.

Iwa khatdooh chwa wow chong, kyrsu kyntu u Rev. Dr.Fr. Ioannis War ya ki Para khon ka Kur, wow man kiwa ri yei burom ka Kur wei im ha ka Nongrim iong ka Chankylliang ka Rap Kylliang kam wa ki warim manchwa longchwa ka Kur ka jait kat cha wa chong wasah man ki ki bru waioh yei maia wei chaniah na kiwi.

Ha kani ka sngi kam ka dak wow pynsah kynmoo ya kani ka sngi da em leh I pynkup burom ya ki ar ngut ki Manbei ka Kur kiwa da Kynjooh yei rta wa 80 snem, neitae I pynkup burom leh ya ki khon khynroo khyllood ka Kur kiwa da rah nam rah burom ya ka Kur ha ki Examination wapher.

Ya kani ka sngi da pynphooh pynphein wei pynchongchit leh da ki chad ki rwai wa da chimbynta da ki khon ka Kur War na Mynso, Jwai, Kyndong wa na Namdong.