Bret ñiut ka Jowai Municipal Board ha wahduid, theh umpjah iaka kam iada Myntdu: SSWA

Syllad | The Rising MeghalayaMarch 29, 2022

Ka San Shnong Welfare Association (SSWA), ka Wapung Shnong kila ujor sha u Deputy Commissioner, East Jaintia Hills District pyrshah iaka Jowai Municipal Board (JMB) bad kyntu ia u ban bthah iaka JMB ban wan khat mardor iaki ñiut kiba kala bret pathar ha lynti syngkieng, surok  bad ka wahduid.

Ka San Shnong bad ka Wapung Shong haka jingujor sha u DC East Jaintia Hills District kila ong “ngi kyrpad ïa phi ki bor ha halor ba phin sngewbha ban phah ïa Jowai Municipal Board ba kan leit kit mardor ïa kitei ki ñiut na katei ka jaka lym kumta ngin ïaid da kawei ka lynti”.

Ka San Shnong kala ong “Kila wan ban bret ïa katei ka ñuit ha ka 25 tarik Lber, 2022 ha ka por mynmeit. Kane ka jingleh jong ka Jowai Municipal Board ka buh jingma ïaka Wahduid, mariang bad kiwei kiwei, khamtam ïaki nongshong shnong ba marjan katei ka jaka bad ki nongleit nongwan kiba ïaid lynti najan katei ka jaka,”

Ka San Shnong Welfare Association (SSWA) ka kynthup iaka shnong Mukhaialong, Cham Cham, Lumchyrmit, Mutong bad Pynthorsale bad kine ki shnong kidei kiba la sdang ban paw haka kam jngoh kai da kaba kila pyrshang ruh ban ai jingiada iaka bynta ba sharum ka Wah Myntdu.

Pynban kane ka jingwan theh ñiut ka JMB ha ki lynti synkieng bad ka wahduid harud surok Mukhalalong – Lumshyrmit Road ka jaka kaba la tip kum ka Mynkhiat bad ha ka Wahduid Myrthe kala theh umpjah iaka jingpyrshang ban iada iaka bynta ba sharum ka wah Myntdu.

“Kane ka jingleh jong ka Jowai Municipal Board kan ktah iaka koit ka khiah ki nong wan jngohkai kumjuh iaki nongshong shnong namar ka jingsma iwtung bad ka jingbret pathar ia ki niut ki nier sha ki um ki wah. Kine ki wah ki tuid sha ka bynta ba sharum ka wah Myntdu, ka wah kaba la sdang ban khie im bad ai jingiada da ka San Shnong,” la ong u Secretary San Shnong Welfare Association Ma Tyrnit Pdein.

Ki nongialam ka San Shnong kiba kynthup ia u Ma P Dkhar President San Shnong, Ma Tyrnit Pdein Secretary San Shnong kynthup ia u Waheh Shnong Wapung Shnong Ma Kduplang Ryngkhlem, Waheh Shnong Pynthorsale Ma  Yooki Phawa  bad kiwei kiwei ki riew rangbah kila jurip ia kane ka jaka ba theh ñiut ka JMB bad kila pynpaw iaka jingsngewdiaw halor ka jinglehbymsuidniew ka JMB iaka koit ka khiah ki nongshong shnong.

Shuh shuh ki sengbhalang ha katei ka thain kiba kynthup iaka JSM, MPUF bad kiwei kiwei ruh kila  ieng pyrshah ia ka jingleh khlem akor bad leh thurmur jong ka Municipal Jowai bad dawa ba kan leit khar biang ia kitei ki ñiut kiba la bret pathar.