Brup jaw umkhmat ka longkmie bym lah iohi ka khmat ba ioh iing thymmai na i trep ba jot ha Kremmyrsiang hajan ka shnong Namdong

Syllad | The Rising MeghalayaMay 6, 2023

Kawei ka longkmie kabym lah ban iohi iaka bneng bad ka khyndew marsien pynbna bad la aiti iaka iing kaba la iarap shna da ka Blind Lead Trust Organization, kaba peit ia kiba don jingduna haka khmat ne matlah kala kyan iam kyndit bad brup jaw ki umkhmat jong ka namar ka jingkmen.

Kane ka longkmie kadei ka Kong Mary Kyndait na ka shnong Kremmyrsiang kaba don hajan ka shnong Namdong kaba hap ha Namdong C&RD Block, West Jaiñtia Hills District.

Shuwa kane, ka Kong Mary bad la u lok ki sah haka iing trep bala sop da u phlang bad kane ka iing trep jong ki kala jot rathai, hynrei ka jingdon jong ki dkhot bad ki nongialam ka Blind Lead Trust Organization ia ka mynsiem ban ai, kila iarap pynshna ia ka iing kane ka longkmie.

Ïa kane ka ïing thymmai la ot ribon da u MDC ka thaiñ u Dawan Lyngdoh bad ïa u shabi ka ïing la aiti da u Managing Director And Co-founder jong ka Blind Lead Trust Organization u Jitendra Dkhar haki kti ka Kong Mary Kyndait haka jingïalang lyngkot haka sngi Saitjain.

U Jitendra Dkhar haka jingkren ula ong, ka seng haba ka ïoh jingtip ïaka jingeh jingjynjar ba mad ka Kong Mary Kyndait ha kaba ïadei bad ka ïingsah. Ula ong ba ka seng ka la hiar sha katei ka shnong ban lap ïaka jingshisha.

Ula ong kane ka longkmie ka donkam kyrkieh ban ïoh ïaka ïing kaba bha kaba lait na u slap ka lyer bad kiwei ki jingma ba ap ïaka koit ka khiah jong ka, namar ka ïingtrep ba ka ju sah, kam long shuh kaba shngaiñ ïaka ban shong ban sah ban thiah ban dem artad ba kadei kaba duna ki khmat.

Kumta ka seng kala shim ïaka sien jam ban ïarap pynlut pynsep ban pynïoh da ka ïing kaba bha, tang ba kan ïoh ban riehtngen shwa.

Ula pynpaw ka jingkmen ba wat ki bahaïing, ki paralok para jor bad ki nongshong shnong ka Kremmyrsiang ruh ki la ai jingïarap, la ka long da ka bor met ne da ka pisa.

Ula kyntu ïaka nongshnong bad ïaka imlang sahlang ban ym peit poh ne ibeiñ ïaki briew kiba don jingduna haki dkhot met bad ka bor iohi namar ki ruh ki don ka juh ka hok kumba long lem kiwei ki briew kiba dap ba biang.

Ula kyntu ruh ïaki Dorbar Shnong ban ai bynta lem ïa kiba duna dkhot haki kam shnong kam thaw namar ki ruh ki don ka sap kumba la bynta U Blei.