Bteng JHDS ban sam marbam sha East Jaiñtia Hills

Syllad | The Rising MeghalayaJune 10, 2020

Ka Jaintia Hills Development Society (JHDS) kaba dei ka tnat trei kam mon sngewbha ka Balang Katholik Jowai Diocese ka la bteng ban kner ia la ki kti jingiarap sha ki briew kiba kyrduh ka bam ka dih ha kane ka lockdown, ka jingiakhun pyrshah iaka khlam COVID-19.

Haka 9 tarik une u bnai ka JHDS ka la sam ia ki marbam kum u khaw, u dai, ka shini bad nutrela sha ki 65 tylli ki longiing ha Ladrymbai bad 32 tylli ki longiing ha Mookhep East Jaintia Hills. Ia kine ki jingiarap la wan ai da u Phadar. Manbha Pakem Director ka JHDS ha ryngkat ka jingdon lang u Phadar. Mahimaidas bad ki Team Member ka Childline East Jaintia Hills Disrict.

Ha kane ka sngi la ia don lang ruh u Phadar. Simeon Sungoh Parish Priest ka Good Shepherd Parish Ladrymbai, U Bah James Jyrwa, u Reginald Khiangte bad u Ma Arki Dkhar.

Shuwa ban sam u Phadar Manbha u la ai ka jingbatai (awareness) halor ki mat ba donkam ha kaba iadei bad ka jingpang corona virus. U la batai shaphang ka jingdonkam ban deng ia ki Masks, ban ia jngai iwei na iwei pat (Social Distancing), ban sait ia ki kti manla ka por bad ban lehkhuid ialade bad ia ka iing ka sem. U la kyntu ruh ia ki ban kiar na ka jingbiah kulmar (spiting in public place) ha ki jaka paidbah.  U Phadar Mahimaidass pat u la kyntu ia ki paidbah ban kiar na ka jingtieng (panic) bad ban ym niewbein ne kheinbein ia kito kiba ioh ia kane ka jingpang covid-19.

Na ka liang jong u Phadar Simeon Sungoh u la pynpaw ia ka jingsngewnguh ia ka JHDS, Jowai Diocese kaba la kner ia ki kti sha ki briew ba kyrduh sawdong ka ri lum Jaintia. U kitbok kitrwiang ba kane ka society bad ka Jyllaniam kin nang kiew shaphrang. U Ma James Jyrwa ruh u pynpaw ka jingsngewkmen bad jingsngewnguh na ka bynta kane ka jingiarap. Kumjuh u ma Arki Dkhar u ai khublei sngewnguh ia ka JHDS, Jowai Diocese bad ia ka team baroh kawei na ka bynta ki kam babha ba kane ka society ka la leh ha kylleng ki shnong.

Kumban shu pynkynmaw haduh mynta ka JHDS (Jowai Diocese) ka la kner ia ki kti jong ka sha ki 2305 tylli ki longiing ha ki 72 tylli ki shnong jong ka East bad West Jaintia Hills District.