Bteng ka Dorbar Shnong Mawsynram ban khanglad ia ka lehniam hapoh ka krem Mawjymbuin

Syllad | The Rising MeghalayaJanuary 4, 2025

Ka Dorbar Shnong ka shnong Mawsynram ha ka 3 tarik u Kyllalyngkot ka la ieng skhem ha ka nongrim ba kan ym pyndem ha kino kino ki bor bad ba kan iai bteng ban khang pyrshah ia ka jinglehniam hapoh ka krem Mawjymbuin namar ka dei ka jaka jngohkai.

Haba kren sha ki lad pathai khubor hadien ka jingialang ba la khot pynlong da ka Deputy Commissioner ka East KHasi Hills, ka Kong RM Kurbah, u Assistant Rangbah Shnong bad nongaiktien ka Dorbar u bah Hiamdor Rapsang u la ong ba ka krem Mawjymbuin ka dei kaba la long trai da ka Dorbar Shnong bad naduh kaba sdang la khang pyrshah ia ki jingleh niam hapoh jong kane ka krem.

“Naduh kaba sdang tad haduh mynta, ngim ju shah ia kino kino ki kynhun ba kin wan ban pynlong ia ki jingleh niam hapoh kane ka krem,” u la ong.

Haba pynpaw ba kam shym la don satia kano kano ka jingkhang pyrshah ia ki briew ba kin wan jngoh sha kane ka krem, u Bah Rapsang u la ong, “Watla katta, kino kino ki briew ne ki kynhun kiba wan shangkai sha kane ka krem ki dei ban burom ia ki kyndon jong ka Dorbar Shnong, kata kaba ngi la khang tyngeh ia ki jingleh niam hapoh jong kane ka krem lane ban pynkylla ia kane ka krem kum kum mandir ne ka temple namar kane ka dei ka jaka jngohkai. Ngi hap ban burom ia broh ki nongwan shangkai kiba wan jngoh ia kane ka krem.”

Haba kdew halor ki jingjia ha ki snem ba la dep ha kaba ki briew ki la wan ban lehniam da ka bor hapoh kane ka krem, u Bah Hiamdor u la ong, “Ha ki snem kiba la dep, ki la wan ban theh dud bad ban thang dhup bad bret syntiew kaba la lam ruh sha ka jingpynjaboh ia kane ka krem bad ki jaka ba marjan jong ka. Kumta ka Dorbar Shnong ka la hap ban thung da ki volunteer ki ban khmih bad ki ban khanglad ia kiba kum kine ki jingleh namar ngi kwah ban pynneh pynsah bad ban iada ia kane ka krem.”

“Lada ki briew ki pynkhein ia ki kyndon, ka Dorbar Shnong kan hap ban leh da kaba tyngeh katkum ka ain,” u la maham. “Kane ka krem ka dei kaba plie na ka bynta baroh ki nongwan shangkai naduh ka por 9 baje mynstep haduh 5 baje janmiet man la ka sngi,” u la ong.

Haba kylli, u Bah Rapsang u la ong, “Kine ki briew ki kwah ia ngi ba ngin ai jingbit ia ki ba kin wan lehniam ha kane ka jaka, hynrei ngi la kyntait namar kane ka krem kam dei satia ka jaka lehniam. Ngi la pynpaw da kaba shai kdar ba ki lah ban wan jngoh hynrei ki dei ban bud ryntih ia ki kyndon ba la buh da ka Dorbar Shnong.”

U la ong ruh ba ka Kutumba Surakshya Parishad (KSP) ka la shah ialam bakla halor ka phang kaba iadei bad kane ka krem.

“Hynrei, haba ki (KSP) ki la wan shane hynne ka sngi ma ki ruh ki la pdiang ia kata. Ki briew na kylleng ka ri India ki la wan sha kane ka krem Mawjymbuin khamtam ha ki taiew ba kyrpang jong ki. Haba ki la iohi ia ki signboard kiba ngi la buh ia ki kyndon, bad ki la pynpaw ruh ia ka jingsngewhun ba ki la ioh lad ban wanjngoh ia kane ka jaka. Lada ka dei ka temple jong ki, ki lah ban leh kat kaba ki mon hynrei namar ba ka dei ka jaka jngohkai, kumta ruh kumno kin lah ban pynkylla sha ka temple khamtam haba ka dei ka nongkynti jong kiwei?” U la buh jingkylli da kaba pynpaw ia ka nongrim ba skhem kaba ka Dorbar Shnong ka ieng la ka long ha kano kano ka rukom.

Kumjuh u Bah Rapsang u la pynpaw ba ka jingialang ka la shim ia ka rai ba kane ka kynrum kynram baroh ka la mih tang namar ka jingsngewthuh bakla namar kam shym la don satia ka jingkhang ia ki briew kiba wan shapoh kane ka krem Mawjymbuin.

U la ong ruh ba ka KSP Assam ka la shah ialam bakla ha ki katto katne ki briew da kaba ong ba shah ban lehniam shapoh jong kane ka krem kaba long kaba bakla shibun.