Bteng ka JHTOA ban maham pyrshah ia ki trok 18 taiar ha Rilum Jaintia

Syllad | The Rising MeghalayaAugust 2, 2023

Ka Seng Jaintia Hills Truck Owner Association (JHTOA) sa shisien pat ka buh ka jingmaham kaba tyngeh pyrshah ia ki trok 18 taiar ba kin kit ia kino kino ki mar kum u cement clinker bad kiwei pat napoh Ri Lum Jaintia.

Ka Seng ka pynkynmaw biang na ka por sha ka por naduh ki 2015 ter ter haduh mynta u snem 2023 ban khang pyrshah ia ki ki Trok 18 Tyre Trailer ban load mar Local kum u Cement Clinker napoh Rilum Jaintia namar lada ailad kan pynduh kam ia ki trok kamai jong ki trai ri trai muluk.

Ha u kyrwoh lyngba u Bah Biangshwa Shylla, President ka seng ka la ong ruh ba kane ka jingailad ia kine ki trok 18 taiar ba kin kit mar baroh  baroh ki karkhana ne factory kin thied  kum kine ki jait kali 18 taiar bad ki kali  na shabar ka jylla  kin wan load direct na ki factory, ha kajaka ba kin pynkit ne load na Byrni bad kane kan  ktah jur ia ka kamai kajih jong ki trai jylla khamtam ia kiba buh ia ki trok kamai.

Nalor kata ka seng ka la ong ruh ba lada shah ia kine ki kali 18 taiar ka  jingdheng kali kan long kaba jur bha hapoh Rilum Jaintia hi baroh kawei. Kawei ruh ka long namar ki lynti surok ruh kim pat iahap bad kine ki kali  ba kin kamai  sha kane ka thain.

Shuh shuh ka seng ka la ong ba lada kine ki kali kin load cement/clinker da ki 100 tylli ha ka shisngi kan don ka jingktah kaba jur ia ki paidbah ki khynnah skul bad ki nongleit nongwan khamtam ia ki kali kiba kit ia kiba pang ba shitom.

Kumta na ka liang ka seng ka kyrpad biang ia baroh ki trai trok trailer kumjuh ruh ki nongpyniaid ia kine ki Trok 18 taiar ba kin sngewbha ban iatreilang bad ka seng khnang ba kan ym wanrah ia kino kino ki jingeh.