Bteng ka jingioh khur takma ka Meghalaya na ka lympung 38th National Games

Syllad | The Rising MeghalayaFebruary 6, 2025

Ka jylla Meghalaya ka la bteng ban ioh khur takma na ka lympung 38th National Games kaba la long ha Uttarakhand hadien ba ka la ioh biang ia ka jingjop ha ki jingiakop king lieng bad kaba la kyntiew ia ka jingioh takma sha ka santylli.

Kane ka la wan long hadien ba ka Meghalaya ka la ioh ban khur ia ka takma ksiar kaba nyngkong eh lyngba u Vikash Rana ha ka jingiakop ‘Men’s Kayak Cross Extreme Slalom,’ bad ka Elizabeth Vincent kaba la jop ia ka takma rupa ha ka ‘Women’s Kayak Cross Extreme Slalom’ ha ka 6 tarik Rymphang.

Ki laingut kiwei pat kiba la ioh khur takma kham hashwa na ki jingiakop king lieng ki kynthup ia u Indra Sharma 15 snem rta na Ri Bhoi uba la jop ia ka takma rupa ha ka ‘Men’s Slalom C1 Event ‘ ka Kiran Devi bad B Anandhi jong ka Assam Rifles Rowing node ha ka jingiakop king lieng ba arngut ‘Lightweight Women’s Double Sculls’ nalor u Pynshngain Kurbah uba la ioh khur ia ka takma rnong ha ka ‘Men’s Slalom K1.’

U Vikash 23 snem rta u dei uba la pyntbit ialade ha kane ka jait jingialehkai mynta la 4 snem ula ioh ia ka jinghikai kaba pura na ka Association ka jong u hi.

Ka Elizabeth Vincent, 26 snem rta kadei kaba la khur teng ia ki khusnam ha ki jingiakob bapher bapher kaba kynthup ia artylli ki takma rnong ha ka Asian Canoe Championships ha u 2024. Kadei ruh kaba ia don bynta ha ka kynhun ialehaki jong ka ri India ha ki jingiakob ki bapher.

Na ka liang ka Meghalaya Canoe Association kala ieng rangbah ha kane ka jingiakob ha kaba baroh 4 ngut na ki nongialehkai ki jong ka kiba la ioh rung ha kane ka lympung kila ioh ban khur takma. Ka jingjop jong kane ka Association kala long ka nuksa kaba khlain ia ka jingiatreilang jong ki nongialehkai, ki nongpyniaid bad ka jingkyrshan kaba ki ioh na ka tnad ialehkai jong ka jylla.

Mynta ka Jylla ka la ia ryngkat ha ka jingioh khur takma ha ka National Games kaba la long ha u snem 2007 ha Assam da kaba ioh ban khur santylli ki takma.

Baroh kine ki nong ioh khur takma na katei ka lympung kin sa ioh pdiang ia ka song pisa, ka scholarship bad kiwei kiwei ki khusnam na ka Tnad Sports and Youth Affairs ka jylla.

Kumba la pynbna da u Myntri Rangbah ka jylla u Conrad K Sangma, ka jylla kan sa shimkhia ruh katkum ka Sports Policy ka jylla ban tyrwa kam sorkar ia kine ki nongialehkai kiba la ioh khur ia ki takma.