Bteng ka jingleit jurip u CM ia ki jaka ba shah ktah na ka jingshlei um ha Rilum Garo

Syllad | The Rising MeghalayaOctober 9, 2024

U Myntri Rangbah ka Jylla u Conrad K Sangma ha ka 9 tarik u Risaw u la bteng ia ka jingleit jurip ha ka sngi kaba ar sha kito ki thain kiba la shah ktah na ka jingshlei um bad ki jingjia twa khyndew ha Rilum Garo.

U CM ha ka jingsynran lang da ki bor pyniaid district u la leit jurip ia kiba buntylli ki shnong kiba hap hapoh Chokpot Civil Sub Division ha South Garo Hills, kata kaba kynthup ia ka jingkieng halor ka wah Dareng kaba pyniasoh ia ka shnong Reni Badimagre sha Bibragre. Kane ka jingkieng ka dei kaba la shah pynkhyllem noh na ka jingsyllad ka umsaw. Hynrei, kane ka jingshlei um kam shym la ktah satia ia ki nongshong shnong ha Reni Badimagre.

Nalor kata u la leit jurip ruh ia ka skul Mt Carmel hajan iew Chokpot kaba la shah ktah ha ka jingshlei um, kata watla kam shym la don ka jingshah ktah ia ka jingtei hynrei kiba bun ki mar ki mata kum ki kot ki sla bad ki jingbuh jingsat ki la shah pynjulor.

U la bteng ban leit jurip ruh ia ki iing ki sem ha Bibragre, Chokpot ha kaba baroh ki la don haduh 20 tylli ki iing ki sem kiba la shah ktah ha ka jingshlei um kynthup ia 9 tylli kiba la shah pynjulor.Halor kine ki jingjia u la sam ia ka song jingiarap pisa sha baroh ki 20 tylli ki longiing.

Ha ka shnong Rongrakgre u CM u la ioh ruh ban iamir jingmut bad ki longiing longsem kiba la shah ktah ha ka jingshlei um. Ki la don baroh haduh 38 tylli ki longiing kiba la shah ktah bad 24 tylli ki iing ki sem kiba la shah pynjulor ha kaba u la pynioh ia ka song jingiarap sha baroh.

U Conrad u la ioh ruh ban iakren bad ki nongshong shnong kiba la shah ktah ha ka shnong Gonganggre bad Danggilgre kiba don 27 tylli ki longiing kiba la shah ktah bad 10 tylli ki iing kiba shah pynjulor ha kaba u la sam ia ka song jingiarap.

Kumjuh u la leit jurip ruh ia ki hynniew tylli ki longiing bad laitylli  ki iing kiba la shah pynjulor ha ka shnong Daramgre bad kumjuh ia ka madan ialehkai Daramgre kaba la shah ktah na ka jingtwa khyndew namar ka jingshlei um ha kaba u la kular ban pynkhuid ia ka jingtwa da ka jingiarap jong ka tnad PWD.

Shuh shuh u CM u la iakynduh ruh ia ki nongshong shnong kiba la shah ktah jong ka shnong Rongrikkimgre bad jurip ia ka jingkieng halor jong ka wah Dareng kaba pyniasoh ia ka shnong Rongrikkimgre bad Dikronggre. Kane ka jingkieng ka dei kba la tei da ka Tnad BADO mynta la bun bun snem.