Bteng ka Kong Chiarmon ban leh ki kam isynei iaki ba duk

Syllad | The Rising MeghalayaApril 7, 2020

Ai jingiarap ka Kong Chiarmon Dkhar sa iaki 58 tylli ki longiing ha Snahleiñ

Ka jingdon kum ka Kong Chiarmon Dkhar kaba na ka  shnong Wapungskur, East Jaintia Hills, ka la long shisha ka jingkyrkhu kaba khraw ia kiba bun ki longing longsem ba duk ba kyrduh ha ka shnong Wapungskur ha kaba kum kane ka por ba  kordit.

Ka Kong Chiarmon Dkhar kam dei ka nongtrei sorkar ne nongmihkhmat paidbah ne bat kano kano ka kam kaba ha khmat ha kano kano ka bynta ruh, hynrei ka dei tang ka riew kynthei bad riew paidbah kumba long lem hi kiwei ki kynthei. Pynban kane ka longkmie ka don ka mynsiem ai bad ka mynsiem leh isynei bad iarap barabor ia ki ba shem shitom shem jynjar.

Ia  kane, la sakhi da ki kam ba bha jong ka ia u duk u suk, kiba ka lah leh ha ki bun ki bynta.

Ka Kong Chiarmon Dkhar, ka longkmie kaba kylluid bad bha mynsiem, ha ka bor bashimet jong ka mawei, mynta ka sngi ruh kumba ka la pynbna ha ki lat pathai khubor ha kine ki sngi ba la dep, ka la bteng biang ia la ka  jong ka kam lehisynei jong ka da kaba ai jingiarap shuh shuh sa ia ki 58 tylli ki ki longiing longsem ba duk ba kyrduh jong ka Dong Snahleiñ, Wapungskur, kiba la shah ktah shisha na ka daw jong ka jingpakhang shnong ha baroh kawei jong ka Ri India da kaba iarap sha man la kawei pa kawei na kitei ki longing da u khaw, ka mluh bad u phan.

Ka kong Chiarmon Dkhar, ka  la leh ia kane ha ryngkat ka jingiadon lang jong ki nongialam jong ka Dong Snahleiñ, naduh u Chairman, u Heplis Ryngkhem, u Secretary, u Sunshine Dkhar bad kiwei kiwei de ki nongialam jong ka Dong.

Hashuwa ban sam ia kitei ki tiar sha kitei ki longiing, la ioh ia ki kyntien lamkhmat bad kyntien sngewnguh ia ka Kong Chiarmon Dkhar  ryngkat bad ka jingduwai ia u Blei Trai Kynrad da u H. Deolangki Dkhar, u Finance Secretary jong ka Dong.

Ka Kong Chiarmon Dkhar, ka lah ong biang ruh, ba kane ka kam jong ka, kan ym kut tang mynta ka sngi, hynrei kan dang iai bteng beit ia ki kam lehisynei jong ka sha ki longing longsem kiba duk ba  kyrduh kiba la shah ktah shisha na ka daw jong ka jingpakhang shnong jong ka Ri India kaba dang bteng haduh mynta ki sngi na ka daw jong ka jingpang khlam COVID-19.