Bteng ka KSU ia ka jingkhynra ia ki nongtrei bar jylla ki bym biang kot biang sla

Syllad | The Rising MeghalayaJuly 13, 2024

Ka Khasi Students’ Union (KSU) ha ka 12 tarik Naitung ka la bteng ban pynlong ka jingkhynra ia ki nongtrei bar jylla bad pynphai dien ruh ia ki spah ngut na ki namar ka jingbym lah ban pyni ia ki kot ki sla kiba biang.

Ki dkhot ka KSU Laban Circle ki la pynlong ia kane ka jingkhynra ia ki nongtrei bar jylla ki bym don satia ia ki work permit ha ki 11 tylli ki jaka pyntrei kiba hap hapoh Laban Pyllun ha kaba la shem ba haduh 52 ngut na ki, ki dei ki bym don satia ia ki kot ki sla kiba biang, bad hadien la pynphai pat ia ki shapoh Assam.

Ha ka juh ka por ka Seng ka la pyrto ruh ia kito ki kontraktor kiba la pyndonkam da ki nongtrei kiba dei ki trai jylla ha ki 9 tylli ki jaka pyntrei ki jong ki.

Na ka liang ka KSU Upper Shillong ruh ka la pynlong ka jingkhynra bad lapdien ia kumba 20 ngut ki nongtrei bar jylla ki bym don satia ia ka work permit.

Kumjuh ka KSU South West Khasi Hills District ruh ka la pynlong ia kiba kum kine ki jingkhynra hapoh ka district bad lapdien ia 16 ngut kiba kum kine ki nongtrei bar jylla kiba pyntrei ia ka surok Nongstoin – Wahkaji ki bym don satia ia ki kot ki sla kiba biang.