Bteng ka KYKWM ban pynlong prokram pynsngewthuh paidbah halor ka kam iada mariang

Syllad | The Rising MeghalayaNovember 10, 2024

Ka Khooid Yaka Wah Myntdu haka 9 tarik Naiweing kala pynlong iaka Dorbar kyrpang ha Iungwalieh ka Dorbar shnong Chilliangraij ban pynsngewthuh halor ki aiñ ki kyndon ban iada iaka mei mariang bad ki sawdong sawkun jong ka.

Ha kane ka jingialang la don bynta lang ruh ka District Legal Service Authority, West Jaintia Hills bad Meghalaya State Pollution Control Board, Shillong.

Ban myntoi ki waheh shnong bad ki dkhot ka Khooid Ya ka Wah Myntdu, ka Kong S. Phyllei, Chief Defence counsel DLSA, West Jaintia Hills kala batai halor ka phang “Various Provision of Environment Laws and Harmful Impact of Pollutions and Evironmental degradation”, katba u Bah W.R. Kharkrang, Senior Environmental Engineer MSPCB ula batai halor ka Solid Waste Management, ki jingshah ktah jong ka mariang nalor kiwei.

U Bah WR Kharkrang, haka jingkren ula pynkynmaw ba ka KHADC kala don iaka ain Waste Management bad Building Bye Law, kumta ka long ruh kaba donkam bha haduh katta katta ba ka JHADC ruh kan thaw iaka ain Waste Management bad Building by Law.

Ha kaba iadei bad ka wah Myntdu, u W.R. Kharkrang ula ong lada ka wah Mynduh ka kan duh kan dam noh na ka jingbym nang ki briew ban niewkor iaka jinglong kyntang ka jong ka, ka jaitbynriew ruh kan sa duh ka dam.

Ha kane ka sngi kala don ruh ka jingiakren iamir halor ka jinglong jingman jong ka wah Myntdu na ka jingdap shyiap dap khyndew jong ka wah, khamtam ka jingbym ioh iaka umrep um riang kaba biang kumjuh ka bam umdih kaba khuid kaba suba nalor kata la iakren ruh ban kyntu iaka sorkar kumjuh ka JHADC ban pyntreikam hok iaki ain ka NGT bad kiwei kiwei.

Ki dkhot ka Khooid Ya Ka Wah Myntdu ryngkat ki waheh shnong hadien ka jingiamir iaphylliew jingmut, kila rai ban buddien iaki kam kiba dang sahteng bad da ka jingiatreilang ki waheh shnong ka seng kan nangioh mynsiem ban trei na ka bynta ban iada bad pynneh pynsah iaka jinglong kyntang ka wah Myntdu.