Bteng ka OCF ia ki kam ai jingiarap sha ki khunswet bad kiba duna dkhot met ha Biar bad Pyntei

Syllad | The Rising MeghalayaJuly 28, 2023

Ka Orphan Children Foundation (OCF) hapoh ka jingialam u Founder Chairman, u Ma L Dkhar ka dang iai bteng ha kaba iadei bad ki kam ai jingiarap ha kaba mynta ka sngi 28 tarik ka la leit ban aijingiarap da ki marbam na ka bynta ki khunswet bad kiba don jingduna ha ki dkhot met ha ka shnong Biar bad Pyntei, West Jaintia Hills District.

Ha kane ka jingialang kaba lyngkot ba la pyniaid da u Secretary Shnong ka Shnong Biar u Ma P Sungoh uba bat ruh kum u Finance Secretary ka OCF, WJHD. La ioh ka jingkren lyngkot na ka Kong M Bareh Office Secretary Orphan Children Foundation bad ruh na u nongseng ne Founder Chairman ka OCF u Ma L Dkhar.

Katba ha ka prokram bala pynlong ha ka shnong Pyntei la pyniaid ia ka jingialang da u Secretary Shnong u Ma Y Syngkon uba la pynpaw ba kum ka Shnong hi ka pdiang sngewbha bad sngew burom shi katdei eh ia kane ka Foundation kaba la lah ban wan aijingiarap ia ki khynnah khunswet kumjuh ia ki briew kiba don jinduna ha ki dkhot met kiba donkam shisha ia ki lad jingiarap.

Kiwei pat kiba la aijingkren ki kynthup ruh ia u Finance Secretary ka OCF u Ma P Sungoh, u Ma L Dkhar Founder Chairman uba ha ka jingkren u la ong ba ka Foundation ka long kaba kloi ban aijingiarap sha kiba kum kine ki briew kiba donkam ia ka jingiarap, bad u la ong ruh ka thong kaba hakhmat jong ka Foundation ka long ban pynbiang tara jur ia ki khynnah, kata la ki long ki khunswet ne kiba duna ha ki dkhot met namar wat lada kim don kmie don kpa ne wat lada ki duna ha ki dkhot met ym dei ban ibeiñ ne leh beiñ ia ki.

Nalor kata u la ong ruh ba lada dang don ki khynnah ki bym pat ioh jingiarap ha kane ka sngi ha kane ka Shnong ki lah ban pyntip ha ki volunteer jong kane ka Foundation khnang ba kin lah ban leh ia kaba donkam. U la ong ruh ba lada ki nongri nongsumar ki iakynduh jingeh khamtam ha ka por ba ki pang ki shitom ka foundation ka kloi ban iarap  bad da ka jingkyrmen ba kin sa ioh biang ki lad ban iakynduh bad ban iarap ia kine ki khunswet bad kiba don jingduna ha ki dkhot met da ka jingi trei lang bad ki nongpyniaiad shnong jong kane ka Shnong.

Shuh shuh u la ong ruh u la iohi ia shibun ki jingeh kaba kine ki khynnah ki donkam ia ka jingiarap, hynrei ka foundation kaba dang rit kam pat lah ban lehbha hynrei da ka jingkyrkhu jong u Blei ka lad kan sa plie nangne shakhmat.