Bteng ka OCF ia ki kam aijingiarap sha ki khynnah khunswet 

Syllad | The Rising MeghalayaAugust 5, 2023

Ka Orphan Children Foundation (OCF) hapoh ka jingialam u Founder Chairman u L Dkhar sa shisien pat ka la ioh ia ka lad ban iarap da ki marbam bad blanket ia ki Khunswet kiba don ha ka shnong Pamrakmai, East Jaintia Hills District.

Haba ai jingkren u Bah Dkhar u la ong ba ka Foundation hi ka kloi ban iarap ia ki khynnah khunswet ha kano kano ka por ba ki donkam jingiarap bad u la ong ruh ba ka foundation ka lah ban iarap da ki marbam bai skul bad khamtam ha ka por ba ki pang ki shitom.

Nalor kata u la ong ruh ka foundation ka iakynduh shibun ki jingeh khamtam ba kim pat don ia ka jaka shong ki khunswet, kumta kam pat lah ban shimti ia ki. Hynrei watla katta ruh da ka jingshaniah ha U Blei bad da ka jingiatrei lang jong ki kato katne ngut ki briew ba sbun mynsiem ka Foundation ka lah ban iaid sha khmat bad ka lah ban nang iai bteng shuh shuh ka jingiarap sha ki khunswet bad kiba don jingduna ha ki dkhot met.

Shuh shuh ha kane ka sngi la ia don lang da kiba haiing hasem jong kine ki khynnah nalor u Office Secretary Orphan children Foundation, East Jaintia Hill District u samla E Dkhar bad ka Volunteer ka OCF na East Jaintia ka kong R Sungoh.

Haka sngi Thohdieng ruh ka OCF kala sam marbam haka shnong Nongkynrih, West Jaintia Hills District.