Bteng ka Rotary Club Jowai ban iarap da ki tiar iada khlam COVID-19

Syllad | The Rising MeghalayaMay 10, 2020

Ka Rotary Club, Jowai kala bteng ban kner la ka kti ban iarap da ki ki tiar ïada naka khlam COVID-19 ha sor Jowai.

Haka sngi Saitjain hapoh ka jingialam u president Rotary Club JM Pohsngap, u general secretary Rudolf E Laloo bad haka jingïadonlang u ADM, West Jaintia Hills L Kynjing kila sam ïa ki tiar ïada khlam ba kynthup iaki mask bad ki hand sanitizer sha ki nongshnong shnong ka Mynthong, Jowai.

Ha kane ka jingsam ia kine ki tiar da khmat da khmut naka dorbar shnong Mynthong la ïadonlang u waheh shnong L Pohktai, secretary shnong RT Khonglah bad ki dkhot ka executive body ka shnong Mynthong.

Ka dorbar shnong Mynthong kala ai khublei ïaka Rotary halor ka jingai sngewbha da kine ki tiar iada kiba kongsan bha ha kum kane ka por ba ki paidbah ki donkam ban iada ialade ban iakhun pyrshah iaka khlam.

Kumban shu pynkynpaw ka Rotary Club Jowai kala sam ia kine ki tiar iada sha ki nongtrei ka FCI, ki nongniah trok, ki nongbylla, ki wholesaler kiba dei ki briew kiba hakhmat ban pynioh marbam ha kum kane ka por ba iakhun iaka khlam COVID-19.