Bteng ka Seinraij Jowai ban khang iew, tang kiba ai tika COVID-19 ki ban ioh shong die

Syllad | The Rising MeghalayaMay 16, 2021

Ka Seinraij Jowai kala rai ban bteng biang ban khang iaki iew kiba ka pyniaid ha sor Jowai haduh ka 28 tarik une u bnai. Hashuwa kane ka Seinraij Jowai kala khang iew naduh 11 tarik une u bnai kum shibynta ban tem iaka jingpur ka khlam COVID-19.

Ka Seinraij Jowai kala khang iaki iew da ka mon sngewbha hadien ba kala iohi iaka jingtur u paidbah iaki iew ki hat khlem da bud ryntih iaki kyndon ban iada iaka khlam COVID-19.

Ka jingkhang khyrdep ka long naduh na madan Datlawakor (Stand War), madan Siat-thong, madan Chad Sukra (Stand Ummulong), madan Kñia Khat (Stand Shangpung), madan Moosaphir haduh Stand Indica.

U Ma OR Shallam, president Seinraij Jowai haka Sngi U Blei ula ong ba ka Seinraij kala rai ban bteng iaka jingkhang iaki iew baka pyniaid tad haduh 28 tarik une u bnai. Ula ong ruh ba shuwa ban plie iaki iew ka Seinraij kan ai jingtip lai sngi shuwa.

Shuh shuh ula ong ba kiba lah ban shongiew ne die jingdie haki basa iew ka Seinraij ki dei tang kito ki nongdie jingdie kiba la dep ban ai tika COVID-19 bad la bthah ba baroh ki dei ban rah lang iaki certificate ai tika haba wan shong die jingdie.

Haka juh ka por, ka Seinraij Jowai kala banjur ia baroh ban ai tika khamtam ki ophisar naduh Secretariat haduh ki ophisar haki district kiba trei ha ki tnad bapher bapher, kumjuh ki nongmihkhmat paidbah ruh ki dei ban long ki nuksa ia u paidbah da kaba ai tika ialade.

Ka Seinraij Jowai kala kyntu ia baroh ki waheh shnong ne ki nongialam shnong, ki nonghikai haki skul, college bad kiwei ruh ban ai tikla khnang ba lah ban iada ialade na ka khlam COVID-19.