Bteng ka SURE ban pynkupbor iaki briew kiba duna ka bor iohi

Syllad | The Rising MeghalayaFebruary 8, 2024

Ka Society for Urban and Rural Empowerment (SURE) kala bteng biang iaka jinghikai ban pynkupbor iaki briew kiba duna ka bor iohi (visually impaired) hadien ka jingseisoh ka jinghikai haka shnong Moosakhia ha u snem bala dep ha ka ban shna synsar, mynta ka kynti kala sdang iaka jinghikai ka kylla kaba ar sa haka dong Lumbhadahka, Wahiajer.

Kane ka jinghikai shna synsar da ka kti, la kyrshan pisa da ka office jong ka Diistrict Social Welfare Department, Jowai bad iaka jinghikai yn khlieh da u Kelvin Suting uba long u State Award Winning Master Craftman uba ïalade ruh u long u bym lah ban ïohi. Ki don 10 ngut kiban shimbynta ha kane ka jingai jinghikai.

Ar ngut kiba shah hikai haka kylla kaba nyngkong, ka Durka Sari na ka shnong Mukhla kala lah ban pynmih shibun ki synshar ïa kiba ka la ïoh die. Kumjuh ruh uwei pat uba la ïoh training u Krishna Phawa ba na ka shnong Mihmyntdu, ruh ula shna synsar bad leit die sha Jowai bad Shillong wat hapdeng ka jingbym lah ïohi ruh.

Ia kane ka jinghikai kaba 15 sngi lynter la plie iaka haka 6 tarik Rymphang da u Bah FB Basan MCS, ADC bad Project Director District Rural Development Agency (DRDA) haka jingialang kaba long ha hall ka dong Lumbhadakha. La La iadonlang ki Rangbad Dong jong ka dong Lumbhahdakha.

Haba kren kum u kongsan jong ka jingialang u Basan ula kyntu ia ki nongiohtraining ba kin shimkhia ia ka training bad ban trei ia ka kam kaba ki la ioh jinghikai.

U ma Heipor Laloo uba long kum u Supervisor District Social Welfare Department ula ong ba ka ophis jong ki ka dei kaba dei peit ia ki briew kiba don ha ka jingduna bad naka liang ka ophis ka sngewkmen ba SURE ka shim ia kane ka sienjam ban hikai ia ki briew kiba duna haka bor iohi. Ha kane ka sngi la ioh ruh iaka jingkren na u Chairman Dong Lumbhahdakha u ma Salonmiki Dhar uba la ong ba ka dong ka sngewkmen ban pdiang ia kane ka training. U ma Lambor Suchen uba long u District Skill Officer  ula kren shaphang ki skil training kiba la pyntrekam ha ka District.

Kiwei kiba kren ki dei ka kong Niwanka Shylla Project Coordinator SURE, ka kong Ilasiewdor Gashanga kaba la batai shaphang ki Skill Training kiba la leh da ka SURE kaba long ka Training Provider jong ka Meghalaya State Skilll Development Society (MSSDS).