Bteng ka VPP ban iakhih yn shah thngan u bah Ardent haduh ban pynbeit iaka reservation policy

Syllad | The Rising MeghalayaMay 19, 2023

Ka Voice of the People Party (VPP) kala rai ban bteng ia ka jingiakhih hadien ba kam shym la hun iaka jingiakren halor ka Roster System kaba la khot ka sorkar haka sngi Thohdieng ha Shillong. Ki nongialam ka party kiba la leit ban iashim bynta kila mih jyndat noh na ka jingialang katba ka dang iaid ha Secretariat.

Haba kren haka jingialang ha phyllaw ka Additional Secretariat, u President u bah Ardent M Basaiawmoit u la pynbna ba un shah thngan haduh ba ka sorkar kan pynbeit iaka reservation policy. “Haba ka parti kala rai ban phah ia nga ban leit shah thngan, ngan leit kum u shipai jong ka party”, la ong u bah Ardent.

U la bynrap, “Lada ki nud ban ong ban ym pynsngap ban pyntyllun ia ka Roster system, hadien ngi la shim ia kane ka sienjam ban pynlong ia ka jingshah thngan, wat mut ba u bah Ardent un shah thngan tang shi sngi ar sngi, haduh ba phin da pyndep, kata kaba nga kwah ban ong iaphi”, la ong u bah Ardent ha ka jingialang paidbah.

U la ong ba un shah thngan naduh ka 23 tarik haduh ban pynurlong kam ia ka jingdawa.

Ha kajuh ka por, u la ong ba la don kiba thmu ban pynpait ia VPP, ban thied ia ki ar ngut ki MLA ka VPP, hynrei u la ong ba yn ym don kano kano ka bor kaba lah ban pynpait ia ka VPP namar ba ka iatylli beit mlon kum ka party.