Bteng ki nongshong shnong ka Khanduli ban mad ia ki jingeh na ka jingshah thombor ha ki Karbi

Syllad | The Rising MeghalayaMarch 24, 2025

Ka Khanduli ka shnong kaba hap hapoh West Jaintia Hills District kaba long kawei na ki Shnong kiba dang don mynta ha ka jingiakajia pud bad ka Jylla Assam bad haduh mynta ki nongshong shnong ka Khanduli ki dang bteng ban iakynduh ia ki jingeh na ka jingshah pyndik bad shah thombor na ka por sha ka por ha ki Karbi jong ki shnong kiba marjan.

Ha ka jingjia kaba dang shen ki nongtrei ka tnat Forest jong ka Assam ryngkat bad ki shi kynhun ki nongshong shnong Karbi kiba la rah da ki wait bad ki dieng ki la leit hiar sha ka Khlaw Pdienlangho jong ka shnong Khanduli da ka jingthmu ban pynthut ia ka jingpom dieng jong ki nongshong shnong Khanduli namar ki Karbi ki kam ba katei ka khlaw ka dang hap hapoh shnong Karbi ba tip kyrteng kum ka Tadonglangso.

Hadien ba la poi ha katei ka khlaw, ki nongtrei ka tnat Forest ki la leit ban bat noh ia kawei ka kali Bolero pickup kaba la niah hi da u trai kali uba la tip kyrteng kum u Ma Hom Muruh. Hynrei ynda u Ma Hom ula iohi ia ki nongtrei jong ka tnat Forest bad ki Karbi ula ieh ia ka kali bad phet rieh bad rah lang ia u shabi kali.

Kumta na ka liang nongtrei jong ka tnad Forest ki hap ban shu tan noh ia katei ka kali bolero pickup jong u Ma Hom da ka jingthmu ban leit rah ia ka shaduh Hamrem, West Karbi Anglong District.

U Hom ula pyntip mar mar ia kane ka jingjia sha kiba haiing hasem jong u bad ula bthah ia ki ban leit da kawei pat ka Bolero kaba don ia u number MLA 04C 3505 sha shnong Tadonglangso lyngba ka surok kaba poi sha IB Assam hajan ka shnong Khanduli.

Kumta katto katne ngut ki ba haiing hasem kila leit sha katei ka jaka kumba la bthah da u Ma Hom, hynrei ynda kila poi hajan kane ka jaka ki Karbi kila lynthem maw iaka kali bad ka iit kali kaba na khmat ka la julor, bad ym banse kitei ki ba haiing kila phet noh na katei ka jaka hynrei u nongniah jong katei ka kali ia uba la tip kyrteng kum u Solmon Laloo ula ngat ha ka kti jong ki nongtrei ka tnat Forest bad ula shah rah lang bad katei ka kali sha Hamren.

Na ka liang ki bor pyniaid District kila phah mardor ia u Executive Magistrate Ma GH Passah bad ki pulit sha ka shnong Khanduli khnang ban tehlakam bad ban pyllait ia kitei kali.

Na ka liang ki nongshong jong ka shnong Khanduli ruh ki la iamih paidbah haka janmiet 22 tarik Lber ha ka jingap khmih lynti ba kitei ki kali kin poi noh ha shnong hadien ba kila bna khubor ba yn pyllait noh ia kitei ki kali hadien ka jingshim khia jong ki bor pyniaid district hynrei katei ka jingap khmih lynti kam shym la urlong satia, namar la lah ban pyllait ia ka kali bad u nongniah haduh ka 23 tarik, katba ia kawei pat ka kali Bolero pickup ka dang neh Hamren.