Bteng ki nongtrei SSA ia ka jingiakhih, kyntait ia ka jingpynkiew ba 25% dawa ia ka 80% kumba la rai

Syllad | The Rising MeghalayaAugust 1, 2024

Ka All Meghalaya SSA Non-Teaching Staffs Association (AMSSANTSA) haka 31 tarik Naitung ki la bteng ia ka jingiakhih shong kyllain mungor hadien ba ki la kyntait ia ka rai pynkiew tulop ba 25% jong ka sorkar Jylla bad ieng beit halor ka jingdawa pynkiew kaba 80 percent.

Na ka liang u Commissioner & Secretary incharge Education, u Vijay Mantri u la leit ban iakynduh ia ki nongtrei SSA ha ka jaka pynlong jingiakhih ha Madan Malki ha ka janmiet 31 tarik bad kular ba ka sorkar Jylla kan sa shim ia ka rai halor ka jingdawa ka jong ki ha ka 1 tarik Nailar 2024.

“Nga la iakynduh ia ki bad sngap ia ki jingpynpaw ki jong ki.Ia kane ka jingdawa la dep ban pynsngew sha u Myntri Rangbah ka Jylla. Lashai ka sngi 1 tarik Nailar u Myntri Rangbah u la khot ia ka jingialang kaba kyrkieh bad ki ophisar na ka bynta ban iakren bad shim rai halor kane ka jingdawa ka jong ki. U CM u la iakren ruh bad ki lyngba ka phone bad pyntip sha ki ba ka sorkar kan sa ai ka jingmynjur ia ka jingdawa ka jong ki,” ong u Commissioner.

Ha ka 26 tarik Naitung, ia ka rai pynkiew tulop kaba 25% sha ki nongtrei SSA la pynbna da u Special Officer incharge Education department lyngba ka shithi ba la phah sha u State Project Director, Samagra Shiksha (SEMAM) & Director of School Education & Literacy, Meghalaya.

Haba kren sha ki lad pathai khubor u Finance Secretary ka Seng u Bah Ricky Shullai u la ong, “Ngi la ioh pdiang ia ka shithi na u Director ka DSEL halor ka rai jong ka sorkar ban kyntiew ia ka tulp da 25%, hynrei ha ka general body meeting ngi la shim ia ka rai ban ieng skhem halor ka jingdawa ban pynkiew sha ka 80%, kata nalor ka 5% ka jingpynkiew ba man la u snem.Kane kalong namar ka jingpynkiew khatduh eh ia ka tulop ka dei naduh u snem 2016.

Baroh ki don 1037 ngut ki nongtrei SSA (Non-teaching Staff) hapoh ka SSA programme ha kaba 35 ki dei kiba don hapoh ka State Level, 295 District bad 707 ngut ha ki Block Level. Ka Sorkar kan donkam ban pynlut sa haduh T.3.19 klur ban pyntreikam ia ka rai ban pynkiew ia ka tulop kaba 25% jong  ki nongtrei SSA.