Bthah ka High Court ban pynbiang bor pahara ha ka krem Mawjymbuin; maham pynphriang khubor lamler

Syllad | The Rising MeghalayaAugust 15, 2024

Ka Iingbishar High Court ka Meghalaya ka la bthah ban buh da ki bor pulit ka Jylla ban pahara ia ka krem Mawjymbuin ha Mawsynram khnang ban lah ban tehlakam ia kino kino ki jingjia kiba lah ban wan jia, bad maham ruh ban pynshitom pyrshah ia kino kino ki briew ne kynhun kiba pynphriang ia ki khubor lamler bad ki jingbyrngem ha kaba iadei bad ka jingpyndonkam ia kane ka jaka ba kyntang.

Ia kane ka hukum la pynmih da ka iingbishar High Court ka Meghalaya ha ka 14 tarik Nailar haba bishar iaka Writ Petition (Civil) 275 jong u 2024 ba la mudui da ka Yatra Committee pyrshah ïa ka Jylla Meghalaya, ka Dorbar Shnong Mawsynram bad kiwei hadien ba ka Yatra Committee ka la shah kyntait ban ai No Objection Certificate ha ka Dorbar Shnong Mawsynram na ka bynta ban pynlong ia ka jingleit leh niam ne yatra ba ju pynlong man la u snem hapoh ka krem ​​Mawjymbuin.

Ka iingbishar ka la ong, “La wanrah shuh shuh ha ka jingtip jong ka iingbishar ba ki don ki briew bad ki kynhun kiba la ialeh ban pynphriang ia ki jingkren lamler bad ki jingbyrngem ha kaba iadei bad ka jingpyndonkam ia ka jaka kyntang. La buh ha ka jingtip ba kyllum ba lada jia ba kum kane ka jingpynphriang ka iingbishar kan shim ia ki sienjam ban pynshitom mardor hadien ba la shim khia ia kane ka kam.” Ka Ïingbishar ka la bthah ruh ïa u Superintendent of Police, East Khasi Hills District ban bthah ïa u Officer-in-charge, Mawsynram Police Station ba un buh da ki pulit na ka bynta ban pynbiang ïa ka jingpahara ha katei ka jaka ba la kdew.

“Namar ba kane ka kam ka dei ban shah bishar bniah shuh shuh shwa ban pynmih ïa kino kino ki hukum ba khatduh, kane ka iingbishar ka shim ba ka long kaba donkam ban thaw ïa ka committee ban peit bniah ïa ka bynta baroh kawei jong ka kam bad kumno ban pynïaid ïa ka krem, da kaba buh ha ka jingmut ïa ka jinglong kyntang jong ka jaka, ha kaba iadei bad ka mariang bad kumjuh ruh ka jingpyrkhat ia ka niam,” ong ka hukum ka High Court.

Kumjuh ka iingbishar High Court ka la bthah ruh ia ka Deputy Commissioner, East Khasi Hills District kaba la don ha Ïingkashari ban tyrwa ïa ki kyrteng jong ki kynhun bad ki briew ne ki nongshim bynta ki ban thaw ïa ka Committee ban bishar bniah ïa kane ka kam bad ban poi sha ka jingpynbeit kaba lah ban pdiang da baroh.

Ka Deputy Commissioner kan shimkhia ban pynbiang ia ka thup jong ki kyrteng jong ki dkhot ka Committee hapoh shi taiew naduh ka 14 tarik bad la buh tarik ia kane ka kam ha ka 22 tarik mynta u bnai na ka bynta ban pynbiang ia ka thup bad na ka bynta ban ioh shuh shuh ia ka jingbthah.

Ha kajuh ka por, haba jubab ia ka jingbthah jong ka Kashari ban bishar biang ia ka rai halor ka jingbym ai NOC na ka bynta ka jingleit niam ba shisien shisnem, u Assistant Rangbah Shnong ka Mawsynram bad u nongaiktien u bah H Rapsang ki la pynpaw ba kim lah ai kano kano ka rai ba duna ka por bad khnang ban wan sha ka jingiasngewthuh jingmut kaba biang bad ban pynwandur ia ki katto katne ki rukom treikam ban ailad ban leit jngoh iaka jaka da kaba suk, donkam shuh shuh katto katne ka jingiamir jingmut. U la pynpaw ruh hakhmat ka iingbishar ba ki pdiang bad tip ïa ka jingshisha ba ka Krem Mawjymbuin ka dei ka jaka jngohkai pyrthei kaba kongsan, nalor ba ka dei ka jaka kyntang haka jingngeit jong ki briew na ki jingngeit bapher bapher.

Halor kane ka jingai jingmut u Assistant Rangbah Shnong ka Mawsynram, u nongiasaid ain jong ka Yatra Committee u S.Jindal u la pyntip ba la sngewthuh ba namar ka jingduna ka por, lah ban long ba ym shym la ioh ia ka rai ne jingmynjur kaba thikna, bad u la pdiang da ka jingbthah ba ha kane ka snem la weng noh shwa ia ka jingiaid paidbah Yatra ban ap ia ki jinglong jingman ki ba dang wan ha kane ka bynta.

Ka iingbishar ka ong ba ka long shisha kaba sngewsih ba ym shym la lah ban poi sha ka rai ban ailad ia ka seng jong ki nongmudui ban pynlong ia ka yatra kaba long kaba kyntang ha ka jingngeit jong ki. Ka iingbishar ka la kdew ruh ia ka jingpdiang ka seng jong ki nongmudui ba ki kloi ban pynsangeh noh ia ka yatra ka long ban ap ia ka jingpynbeit ia ka kam baroh kawei.