Bthah ka High Court Meghalaya ia ka Sorkar Jylla ban pynioh jaka khlem siewdor ban kyntiew ia ki kam liengsuin 

Syllad | The Rising MeghalayaJuly 31, 2024

Ka Iingkashari High Court ka Meghalaya ka la bthah ia ka sorkar Meghalaya ba kan iatreilang bad ka sorkar Pdeng na ka bynta ban wan ia ki lad ki lynti ban pynheh ia ka kad liengsuin Shillong Airport ka ban kyntiew ia ka ioh ka kot jong ka Jylla bad aijingmyntoi ia ki nongshong shnong.

Ia kane ka jingbthah la mynjur ha ka jingshim bishar ia ka PIL No 4 jong u snem 2021 haka 29 tarik Naitung.

Ka iingbishar ka iohi ba ka kam jngohkai pyrthei ka don ia ka bynta kaba kongsan ha kaba wanrah ia ka ioh ka kot sha ka Jylla Meghalaya bad katkum ka kaiphod, la khmih lynti ba ka kam jngohkai pyrthei jong kane ka Jylla kan kiew sha ka T.12,000 Klur ha kaba ka jingwan jong ki nongwan jngohkai man la u snem kan kynjoh sha ka 20 lak kat haduh u snem 2028.

Ka iingbishar ka la ong ban pynurlong ia kane ka thong, ka long kaba donkam eh ban pynbha ia baroh ki bynta kiba iadei bad ka ki ka bah, khamtam eh lyngba ka liengsuin, namar ba ka jingleit jingwan da ka liengsuin ka dei ka rukom kit kaba ki kham jied da ki katto katne ki nongjngohkai pyrthei khnang ban pynduna ia ka por jong ka jingleit jingwan jong ki. Katba ia ka jylla Meghalaya, ban poi sha ka da ka liengsuin ka kham suk ban ia ka lynti surok, namar ba ka Jylla ka shaniah tang ha kine ki ar tylli haba peit ba ka jylla Meghalaya kaba dei ka thain jaka lum, hynrei ym pat don satia ki lynti rel ba la sdang da ki Sorkar haduh mynta .

Watla ka Meghalaya ka don bun bah ki jaka jngohkai pyrthei ban leit jngoh, hynrei ka don tang kawei ka kad liengsuin ha Umroi, ha Shillong ha kaba la pyniaid tang ia ki liengsuin rit kum ka ATR-72, Q-400, bad kiwei kiwei, kata ruh, kita ki treikam, katkum ka ka jinglong jingman jong ka mariang kaba don ha ka. Kaba buh jingeh shuh shuh, ka long ba ym don liengsuin ki ban wan beit beit sha Shillong, kaba la pynlong ia ki nongleit nongwan ban ap haduh 2 kynta shiteng bad haduh 3 kynta ha kad liengsuin Kolkata ban ioh bat ia ki liengsuin ba pyniasoh bad ki nongleit nongwan kiba duna bha ban leit sha Shillong.

Lah ban kdew hangne ​​ba ka kam liengsuin ka dei kawei na ki lad ba kongsan ban wanrah ia ka ioh ka kot ia ka Jylla, nalor ba ka ai kam sha ki samla. Ha kine ki sngi, bun ki nongkhaii ki jied ia ki  liengsuin ka jylla kum ka lad ban leit sha ki iew ki hat, namar la antad ba kine ki kad liengsuin ki ai kam ia palat 15,600 ngut ki briew ha baroh kawei ka Jylla.

Ka iingbishar ka la ong ba ban pynroi ia ka Aerodrome jong ka Jylla bad ki jingtei jong ka, ka rukom treikam jong ka jingiatreilang hapdeng ki Sorkar Jylla bad Sorkar Pdeng ka long kaba donkam bha ban poi sha ka thong jong ka, namar ka dei ka kamram jong ka Sorkar Jylla ban aiti ia ki jaka kiba donkam na ka bynta ban pynroi ia ki kad liengsuin khlem da donkam ban siew ban lait na ki jingeh ha ka kit ka bah bad ka jingpyntreikam kaba jop ia ki prokram iatreilang ban pynbha ia ki kad liengsuin ha Vizag, Khajuraaho, Amritsar, Pathankot, Dehradun, Lucknow, Varanasi kiba long khyndiat ki nuksa, ha kaba ki Sorkar Jylla bapher bapher ki la ai ia ki jaka kiba lait na ki ka jingsiew dor.