Bthah ka High Court Meghalaya iaka NHAI ban pynshai balei ka North East kan hap mad iaka jingshah ïehnoh bein

Syllad | The Rising MeghalayaSeptember 21, 2023

Ka iingbishar High Court ka Meghalaya haka sngi Balang kala bthah ia ka National Highway Authority of India (NHAI) ba kan pynshai balei ka thain shatei lammihngi (North East) kan hap mad iaka jingshah ïehnoh bein haka jingtor ka surok bad ka khlem leh eiei.

Ia kane ka hukum la pynmih da ka Division Bench jong ka iingbishar High Court ka Meghalaya haba pynsngew halor ka PIL No.11/2022 ba la ujor da u Kynjaimon Amse pyrshah ia ka National Highways Authority of India (NHAI) bad kiwei.

Ka High Court ka la ong ba ka dei ka mat kaba sngewkhia jur namar wat hadien ka jingwan iashim bynta da ki nongmihkhmat na ka National Highways Authority of India sha kane ka iingbishar la pynpaw ba ka surok NH-6 na Jowai sha Ratacherra ka long kaba bha lait noh sha ki bynta jong ka Sonapur tunnel kaba ha ka jingshisha kam long da kumta.

Ka iingbishar ka la pynpaw ruh ka jingsngewkhia halor ka surok bah NH6 kaba 2 Km kaba iaid lyngba ka Khliehriat ha kaba ka la pynkyndit ban iohi ia u briew uba rah ryngkat u ryngwiang khwai na shiliang surok ban ap ia u slap khnang ba kin ioh ban khwai dohkha ha ki thliew ki syar jong kane ka surok kaba la tor.

“Kham shakhmat shuh shuh jong ka Khliehriat, ka surok la iohi kumba ban jah rngai noh syndon ha kaba ka la don ka jingujor kaba khah khah da ki nongshong shnong bad ki bor district bad wat da ka committee jong ki MLA sha ka NHAI, hynrei kane kam shym la seisoh satia,” ong ka hukum ka iingbishar.

Kane ka mat ka la paw pyrthei hadien ka jingpynlong ia ka jingpynshai paidbah ban tip halor ki ain ia kaba la pynlong ha kaba kut taiew ba la dep hajan Khliehriat ha kaba ki trai shnong ki la ujor halor ka jingsniew palat pud jong ka surok shaduh Ratacherra.

Ki la don ruh ki khubor kiba pynpaw ba ka la don ka jingtohkit da ka tnat ka sorkar pdeng bad pynlong ka jingtohkit ia ki katto kane ki heh jong ka NHAI kumjuh ia kiba la mihkhmat na ki kontraktor, kaba la pynlong ia ka NHAI ba kan pynpaw khyndiat eh lane leh bym suitniew ia kane lynti surok ba kongsan kaba pyniasoh sha kiwei pat ki jylla jong ka thain Northeast, kata khamtam kum shapoh Barak Valley, Tripura bad Mizoram.

Ka iingbishar ka la ong ruh ba ym shym la iohi ba kam don ka jingmang pisa na ka byna ban maramot ia kane ka surok. Kan jin da long ruh kaba kham biang lada u khliehduh ba dei khmih jong ka thain ne u regional head jong ka NHAI ha ka thain North East un wan jngoh da lade hi ia kane ka surok bad ban iaid lyngba na Jowai sha Ratacherra bad ai ia ka kaiphot, kata halor ka jinglong jingman jong ka surok bad halor ki sienjam ia kiba dei ban shim mardor.

Kane ka jinglong jingman kaba mynta ka la wanrah ka jingjulor ia ki kali kiba iaid ba ieng nalor ka jingsahkut kali kaba shyrkhei ha kane ka surok.

Ka iingbishar ka la hukum ruh ia ka kynhun ba mihkhmat na ka NHAI ban pynthikna ia ki hehduh jong ka NHAI kiba dei jong ka North East ba kin iaid lyngba kane ka surok hapoh ka shitaiew khnang ba kin lah ban ai ia ka kaiphot kat haduh kaba kut jong ka taiew kaban wan. Kane ka jinglong jingman kaba mynta ka dei ka bym lah ban pdiang.

Na ka liang u Amse u la pyntip ha ka iingbishar ba ka tunnel ha Sonapur ka lyngkot palat bad la iohi hashwa ka jingtei ia ka ba kin don ki jingjia twa khyndew ba shyrkhei sha baroh arliang. U nong ujor u la kdew ba wat hadien ba la pynmih hukum halor kane ka bynta, kata kaba kynthup ia kawei ia kaba la hukum ha ka 21 tarik Jylliew 2023, hynrei kam shym la don kano kano ka sienjam ba la shim da ka NHAI ban khmih bniah ia katei ka bynta jong ka tunnel ha Sonapur sha baroh arliang.

“Kane ka copy jong kane ka hukum kan leit sha u Chairman jong ki bor ba hakhliehduh jong ka NHAI na ka bynta ban shim mardor ia ki sienjam ha ryngkat ki jingpynshai balei ka thain North East kan hap ban mad ia kiba kum kine ki jingshah iehnoh bein,” ong ka hukum ka iingbishar.